Asnjë zyrtar nuk do të mbajë përgjegjësi për humbjen e katër milionë eurove të përdorura nga KQZ në dy projekte pilot për votimin elektronik në Fier dhe në Tiranë. Prokuroria ka pushuar hetimet për këtë çështje, pas dy vjetësh.
Mësohet se nga hetimet nuk janë gjetur elementë të veprës penale për dy tenderimet e KQZ-së, në vitin 2013.
Administrata e KQZ-së nënshkroi në atë kohë dy kontrata me me një kompani spanjolle për të testuar sistemin elektronik të numërimit të votave në Fier dhe sistemin elektronik të verifikimit dhe identifikimit e zgjedhësve në Tiranë. Por, të dyja projektet dështuan.
Kompania spanjolle iu referua listës së zgjedhjeve të vitit 2011 dhe parashikoi 42 parti në fletën e votimit, ndërsa në zgjedhjet e vitit 2013 u regjistruan për të garuar 66 parti. Kjo bëri që fleta e votimit të ishte e ndryshme dhe leximi i saj nga kompjuteri ishte i pamundur.
Përveç kësaj, nuk lexoheshin votimet e dyfishta të personave me të njëjtën kartë identiteti e shumë probleme të tjera që çuan në dështimin e projekteve pilot. Pavarësisht dështimeve kompania kishte marrë 90% të parave, me vlerë rreth 4 mln euro. Në miratimin e kontratave, kishin nënshkruar të gjithë anëtarët e Komisionit Qendror të Zgjedhjeve. /tesheshi.com/
