E shtuna ka kaluar pa shumë peripeci për shumë prej skuadrave të njohura europiane në ligat respektive. Kështu ka ngjarë në Premier League, në La Liga, në Seria A e në Bundesligë.
Ndërsa pritet përballja e sotme mes Mançester Junajtedit dhe Çelsit, Totenhemi dhe Mançester Siti i fituan dje pastër takimet e tyre.
Totenhemi mposhti 4-0 Bornmëthin, e Mançester Siti u përgjigj me një fitore 0-3 ndaj Sauthemptonit.
Liverpuli e Arsenali i zhvillojnë sot ndeshjet e tyre të javës së 33-të të kampionatit anglez.
Reali i Madridit, Barcelona dhe Atletiko e Madridit arritën fitore në La Liga, duke ruajtur të njëjtat pozita, në pritje të klasikes Real-Barcelona të javës së ardhshme.
Në fushën e Sporting Gijonit, fitorja 2-3 nuk qe aspak e lehtë për Realin; të njëjtin rezultat, 3-2 përsëriti Barcelona në mbrëmje ndaj Real Sociedadit në “Camp Nou”.
Ndryshe ngjau me Atletikon, trepikëshi i së cilës erdhi nga një fitore e pastër, 3-0, ndaj Osasunës së vendit të fundit në renditje.
Juventusi e Napoli nuk patën probleme ndaj kundërshtarëve në javën e 32-të të Serisë A. Juventusi mundi 0-2 Peskarën në transfertë, qetësisht në pritje të ndeshjes së kthimit ndaj Barcelonës në Champions League. Napoli hapi luftën për vendin e dytë me një fitore 3-0 ndaj Udinezes.
Pas barazimit në derbin e Milanos, qenë dy skuadrat romane që po ashtu barazuan në ndeshjet e tyre. Roma u ndal në shtëpi nga Atalanta me një barazim 1-1; Lacio barazoi 2-2 në fushën e Xhenovës.
Me mendjen tek takimi i së martës ndaj Realit të Madridit, kryesuesit e Bundesligës, bavarezët e Bajernit të Mynihut, barazuan pa gola në fushën e Bajer Leverkusenit, por pa i trazuar pozitat në renditje.
Lajpcigu i vendit të dytë fitoi 4-0 ndaj Frajburgut, e Hofenhajmi i vendit të tretë u përgjigj me rezultatin 5-3 ndaj Borusias së Mynshegladbahut. Fitore pati dhe për Borusian e Dortmundit, që ndaj Eintrahtit të Frankfurtit fiksoi shifrat 3-1. /tesheshi.com/
