Pa asnjë të papritur, Kadri Veseli është rikonfirmuar në krye të PKD-së, partisë së themeluar nga Hashim Thaçi direkt pas lufte, e cila me brum njerëzor nga UÇK, do ishte oponentja e LDK-së historike të presidentit Rugova.
“Sot Partia Demokratike e Kosovës është më e madhe, më e fuqishme, më e konsoliduar, më e gatshme për të marrë mbi vete rolin që i takon, rolin e partisë që u prinë ndryshimeve dhe zhvillimit të vendit. Sot Partia Demokratike e Kosovës bën diferencën me gjithë të tjerët. Sot PDK me punën tuaj dëshmon se është parti e qytetarëve, nga qytetarët dhe për qytetarët. Ky është ligji suprem i partisë tonë. Është shpirti i platformës për Dekadën e Re. Është kuptimi i vetëm për të cilin ekziston Partia Demokratike e Kosovës”, tha Veseli para delegatëve të Konventës zgjedhore, për t’u votuar më pas unanimisht si kryetar i saj.
“Ky është moment nderi jo vetëm për mua por për krejt Kosovën. Ky vend ka paguar shumë për të ardhur deri këtu dhe ne nuk do të lejojmë që të ketë dilema se a do ta fitojmë lirinë, zhvillimin, perspektivën dhe të ardhmen tonë. Askush nuk do të na ndalojë e as të na pengojë që të ecim përpara. Do të punojmë bashkarisht, dhe ju jap fjalën që do ta çojmë amanetin e atyre që dhanë jetën për liri. Kjo do të jetë politika dhe misioni jonë. Kjo që po ndodh sot në PDK është shembull edhe për opozitën se si duhet të punohet”, ka thënë Veseli nën ngazëllimin e vijimit të drejtimit të kësaj force. /tesheshi.com/
