Tenisti legjendar zviceran Roger Federer, 41 vjeç, ka njoftuar se pas Laver Cup, i cili është planifikuar për javën e ardhshme në kryeqytetin britanik Londër, do t’i japë fund karrierës së tij madhështore, transmeton Reuters.
“Siç e dini, në tre vitet e fundit kam pasur shumë probleme me lëndime dhe operacione. Kam punuar shumë për t’u rikthyer në formë të plotë konkurruese, por i di edhe kufizimet e trupit tim, si dhe mesazhin që më thotë së fundmi”, ka thënë zvicerani.
Ai theksoi se është 41 vjeç dhe se në 24 vite ka luajtur më shumë se 1500 ndeshje.
Njëzet tituj Grand Slam
“Tenisi më ka dhënë shumë më tepër sesa kam guxuar të ëndërroj dhe duhet ta pranoj se është koha për t’i dhënë fund karrierës. Laver Cup në Londër javën e ardhshme do të jetë paraqitja ime e fundit”, tha Federer.
Gjatë karrierës së tij, zvicerani i madh fitoi 20 tituj Grand Slam teke, pra gjithsej 103 turne në ATP Tour.
Nga viti 2005 deri në vitin 2007 ai luajti në 10 finale radhazi të Grand Slam-it, në vitin 2014 fitoi Kupën e Davis me Zvicrën dhe gjatë karrierës së tij kaloi 310 javë në krye të listës ATP. /tesheshi.com/
