Panos Kammenos, ministri grek i Mbrojtjes, është njeriu që prej kohësh po i trazon ujërat mes Turqisë dhe Greqisë me deklaratat dhe veprimet e tij.
Tensionin e shtuar mes dy vendeve për shkak të refuzimit të autoriteteve greke për t’i kthyer në Turqi ushtarakët gylenistë të akuzuar për pjesëmarrje në grushtin e dështuar të shtetit, e ka çuar më tej Kammenos me një fluturim mbi ishujt e vegjël Kardak në Egje, duke hedhur kurora me lule në kujtim të ushtarëve të vrarë dekada të shkuara.
Një vizitë e quajtur “provokuese” nga Turqia, pasi u krye menjëherë pasi në të njëjtën zonë qe më herët shefi i Shtabit të Përgjithshëm të Ushtrisë Turke, Hulusi Akar.
Ministria e Jashtme e Turqisë ka përdorur dje një gjuhë të ashpër ndaj ministrit Kammenos, në kundërpërgjigje ndaj komenteve të tij të fundit. Për Ministrinë e Jashtme turke, Panos Kammenos-it i mungon kapaciteti për t’i vlerësuar dhe shprehur me gjykim të shëndoshë zhvillimet.
Sipas Daily Sabah-ut, në deklaratën e dikasterit turk thuhet: “Eshtë shumë për të ardhur keq që një person i tillë, i cili është qartas i pavetëdijshëm për tekstet dypalëshe mbi migracionin e parregullt, të mbajë postin e ministrit të Mbrojtjes të Greqisë, veçanërisht në kohë të tilla kritike.”
“Ne presim që autoritetet greke të veprojnë me ndjenjën e duhur të përgjegjësisë shtetërore dhe të mos bëjnë deklarata që mund t’i dëmtojnë marrëdhëniet midis dy vendeve,” nënvizohet në të njëjtin deklarim të Ministrisë së Jashtme turke. /tesheshi.com/
