Votimet paraprake të së martës kanë vënë në dukje edhe një herë fuqinë e Trump-it dhe të Hillary Clinton-it në kampet respektive, të republikanëve dhe demokratëve.
Donald Trump ka dalë fitues në pesë shtete të tjera amerikane, kurse ish-sekretarja amerikane e Shtetit ka triumfuar në një më pak.
“Sa më përket mua, gjithçka ka mbaruar,” i ka deklaruar Trump një turme mbështetësish, edhe pse ende nuk i ka siguruar të 1.237 delegatët që i duhen për t’u shpallur kandidat presidencial i republikanëve.
“Çfarë nate e madhe,” do të thoshte Hillary Cliton për përkrahësit e saj në Filadelfia. “Le të bëjmë përpara, le të fitojmë nominimin, e në korrik të kthehemi si një parti e bashkuar.”
Trump fitoi bindshëm ndaj dy rivalëve të tij, Ted Cruz dhe John Kasich, në Konektikat, Delavar, Meriland, në Pensilvani e në Roud Ajland.
Te demokratët, Hillary Clinton e la pas Bernie Sanders-in, rivalin e saj të vetëm, në Konektikat, Meriland, në Delavar e Pensilvani. Senatori i Vermontit ia doli të triumfonte në Roud Ajland.
Donald Trump ka aktualisht pas tij 950 delegatë, 287 më pak nga ç’i duhen për t’u shpallur kandidat.
Clinton-i është më pranë objektivit të saj, pasi ka siguruar mbështetjen e 2.141 delegatëve. Për të arritur te shifra 2.383, një numër që i garanton kandidimin e menjëhershëm, asaj do t’i duhen edhe 242 delegatë të tjerë. /tesheshi.com/
