Ka përfunduar pa asnjë marrëveshje takimi i katër liderëve politikë në Shkup, që e zgjat akoma dhe më tej krizën politike. Lideri i LSDM-së, Zoran Zaev, pas takimit tha shkurt se takimet do të vazhdojnë, por pa dhënë detaje se vallë ka patur përparim në bisedimet.
Sipas tij është lënë hapësirë që të njëjtat takime të vazhdojnë në ditët e ardhshme. VMRO dhe LSDM kanë dalë me deklaratë gati identike në të cilat thuhet: “Liderët e partive kryesore politike u takuan sot për t`i vazhduar diskutimet për organizimin e saktë të qeverisë që do t’i përgatisë zgjedhjet, ashtu si është e paraparë në pikën e gjashtë të marrëveshjes së 2 qershorit. Në këtë kontekst, liderët u morrën vesh që të takohen përsëri në ditët në vazhdim”, thuhet në komunikatat e LSDM-së dhe VMRO-së.
Ndërkohë që në vijë të njëjtë ka qenë edhe deklarata e BDI-së, në të cilën mes tjerash thuhet se kryeministri Gruevski prezantoi draft planin e propozuar qeveritar për t`i zbatuar rekomandimet në lidhje me reformat sistematike në fushën e sundimit të ligjit që do të zbatohen në përputhje me pikën 6 nga marrëveshja e 2 qershorit”.. Prononcim lidhur me takimin nuk dhanë as ambasadorët e BE-së dhe SHBA-së, Aivo Orav dhe Xhejs Bejli, të cilët na takim ishin në cilësi të lehtësuesve të dialogut. /tesheshi.com/
