Me gjasë, Berisha nuk do zhgënjejë as kësaj radhe. Ai e ka gjetur sofizmin e tij politik për të mos shkuar në gjykatë, atje ku duhet të pytetet për aferën “Partizani”, për shkak të së cilës ka rënë në burg dhëndëri i tij Jamarbër Malltezi, arrestuar me urdhër të SPAK dy ditë më parë.
“Kurrë nuk kam kundërshtuar dhe nuk do të kundërshtoj një urdhër të organeve gjyqësore me të vetmin kusht që ato të jenë në respekt të kushtetutës. Jam i gatshëm për t’iu përgjigjur çdo pyetjeje, por kurrë për vendime antikushtetuese.
Po konsultohem me juristë dhe të tjerë, që të ndërmarr të gjithë hapat e tjerë në mbrojtje të Kushtetutës.
Në çdo kohë, unë jam i gatshëm të paraqitem, siç jam paraqitur kur më kanë thirrur, për t’u pyetur dhe për çdo gjë.
E vetmja gjë, që nuk mund të pranoj kurrë, të shkel Kushtetutën e vendit”, tha Berisha, që në fakt nuk është paraqitur kurrë në organe drejtësie kur është thirrur. /tesheshi.com/
