Atleti i Xhamajkës ka triumfuar në garën e 200 metrave, ashtu siç qe parashikuar dhe më herët, duke synuar një rekord më vete, atë të fitimit të tre garave në tre olimpiada të ndryshme.
Usain Bolt i përshkoi të 200 metrat për 19.78 sekonda, duke lënë pas kanadezin Andre de Grasse dhe francezin Christophe Lemaitre.
Pasi ka fituar në 100 e 200 metra, Bolt pret të garojë dhe në stafetën 4×100 metra, ku po ashtu synon të dalë sërish ngadhënjyes.
Nëse ia del dhe në garën e fundit, ai do të përsërisë suksesin në dy olimpiadat pararendëse, në Pekin dhe në Londër, ku pati marrë medalje të artë në 100 metra, në 200 metra dhe në 4×100 metra stafetë. Tetë janë medaljet e arta të fituara prej tij në Lojërat Olimpike, që mund të bëhen nëntë në orët në vazhdim.
Vetëm dy atletë kanë fituar më shumë medalje të arta olimpike në atletikë, finlandezi Paavo Nurmi, një vrapues i distancave të gjata, e që ka fituar nëntë medalje të arta mes viteve 1920-1928, dhe amerikani Carl Lewis, që po ashtu ka nëntë medalje të arta të fituara në vitet 1984-1996.
“Unë po përpiqem të jem një nga më të mëdhenjtë, të jem midis Ali-ut dhe Pele-së. Unë i kam bërë njerëzit të duan ta shohin sportin. E kam çuar sportin në një nivel ndryshe,” i ka thënë Usain Bolt transmetuesit britanik BBC. /tesheshi.com/
