Asambleja Socialiste shënoi sot aktin e dorheqjes së Arta Dades si kandidate për kryesinë e PS-së, përzgjedhur nga kryetari Rama. Ajo ka shprehur mosdakortësinë e saj me drejtimin e partisë, që ka qenë pra dhe shkaku i dorëheqjes.
Arta Dade është ndër veteranet e mbetura të PS-së, ndër gratë e ashtëquajtura “senatore” në të majtën shqiptare, fillimet politike të së cilës janë që në vitet ’90-të.
Ajo i përket epokës “Nano”, por edhe pse e afruar dhe e komportuar me Ramën, kohët e fundit kishte nisur të shprehte shenja mosdakortësie, si për qeverisjen ashtu dhe për çështje të brendshme në PS.
Aktin e saj të dorëheqjes e ka mbështetur dhe Mimoza Hafizi, deputetja e Shkodrës që i është bërë krah kolegut Ben Blushi, një fraksionist tashmë në PS me oponencën e fortë të tij ndaj Ramës. Ndërkohë që shenjat të të qënit krah Blushit, kishte dhënë dhe vetë znj. Dade.
Në qeverisjen trevjeçare të Ramës, Dade mban postin e kryetares së komisionit të jashtëm parlamentar, ndërkohë që gjatë karrierës së saj politike në PS ka qenë dhe dy herë ministrie, e Kulturës dhe e Jashtme.
E.H – /tesheshi.com/
