Kryeministri Edi Rama ka shpallur sot një seri lëvizjesh të forta politike që deri pak kohë më parë mendoheshin si të pamundura.
Në mbledhjen e Asamblesë, ai ka shpallur se në shtator do ketë ndryshime qeveri; se do të rinovojë nga e para tërë kupolën e PS-së; se do të shkarkohen krerët lokalë të kësaj partie që kanë futur njerëzit e tyre në punë; si dhe tha se do të futen në votëbesim të gjithë kryetarët e bashkive të PS-së.
Me një fjalë, brenda 4 muajsh mazhoranca do të përfshihet në një proces totalisht katharsisi politik.
Gjatë fjalës së tij në Asamblenë e PS-së, Rama tha se do të ikin dhe ata ministra që sipas njerëzve cilësohen arrogantë.
“Çfarë ndryshimesh në qeveri në shtator duhet të ndryshojmë, cilat ministra, ministri apo sektor nuk janë në lartësinë e kësaj nevoje, që jo thjesht të tregoj shifra dhe statistika po të kenë vendin e tyre në mendjet e zemrat e atyre që na kanë dhënë besimin. Në fund të kësaj fushate do të shohim cilët anëtarë të kryesisë së partisë duhet të largohen nga kryesia dhe cilët janë të rinjtë që duhet të vijnë”, tha kreu i qeverisë.
Rama shpalli se që nga maji PS-ja do të nisë një fushatë në bazë të njëjtë me fushatën zgjedhore për të bindur njerëzit, apo siç e konsideroi Rama, “për të fituar zemrat e atyre që nga gabimet tona apo fajet tona e kemi larguar”.
Ai u ndal tek tema e arrogancës duke thënë se kjo do të ndahet gjatë takimit me njerëzit. Sipas Ramës, rasti i Kukësit shërbeu një mësim për arrogancën për të cilën është etiketuar qeveria.
“Kërcënimi që ne të etikohemi si arrogantë. Pse thonë njerëzit që ne qeverisim me arrogancë? Këtë duhet ta kuptojmë që ta ndajmë: cila pjesë e qeverisjes sonë konsiderohet arrogante, sepse është e drejtë dhe bëjmë reforma të dhimbshme, dhe cila pjesë e qeverisjes sonë është padrejtësisht arrogante me njerëzit? Këtë ne duhet ta ndajmë. Kukësi ishte një mësim shumë i madh për të kuptuar përgjegjësinë tonë, çfarë ne nuk bëmë si duhet dhe çfarë duhet të bëjmë në vijimësi, për mos t’u përsëritur gabimi që duke u nisur për një qëllim të mirë, pa marrë mundimin për ta shpjeguar qëllimin të gjendemi përballë një reagimi që në fund të lë në ballë etiketën e arrogantit”, deklaroi Kryeministri.
Pikërisht duke iu referuar rastit të Kukësit, kreu i qeverisë bëri të ditur se nuk do të ketë më miratim ligjesh pa i konsultuar ata me njerëzit.
“Nuk duhet të kalojmë më ligje të asnjë lloji, pa i bërë më parë transparente për publikun. Ne i kemi bërë, po nuk është detyra e njerëzve që të rinë me celular në dorë dhe para kompjuterit që t’i kërkojnë, po detyra jonë t’jua themi, t’jua nënvizojmë çfarë po bëjmë. Ashtu sikundër është detyra jonë, sot tani, në këtë moment që po flasim, të garantojmë që vetingu në polici të mos krijojë turbulli mes trupave policore dhe ka nevojë jo thjesht të dëgjojnë po dhe të asistohen një për një për ta kuptuar dhe për ta plotësuar atë pjesë të detyrimit që ka ligji. Ashtu sikundër është detyra jonë të bëjmë këtë gjë me të gjitha grupet e interesit dhe komunitetet”, tha më tej Rama.
Përveçc ndryshimeve në qeveri, largimeve të kryetarëve dhe çmontimin e nepotizmit në administratë, kryeministri ka deklaruar edhe një “katharsis” për të gjithë kryebashkiakët.
Rama shpalli se të gjithë ata që janë të PS-së duhet të kalojnë në votbesim; që do të thotë se do të votohen nominalisht nga popullsitë e bashkive të tyre nëpërmjet platformës online.
Duke krijuar një profil të atyre që do të largohen, Rama tha se ata drejtuesh qarqesh që nuk kanë bërë punën do ikin. Këtë e ka pasur për ministrat e PS-së që janë drejtues qarqesh. /tesheshi.com/
