Vizatimi i një artisteje italiane e frymëzuar nga arrestimi i adoleshentit palestinez Fawzi al-Junaidi, gjatë një proteste kundër deklaratës së Trump për njohjen e Jerusalemit si kryeqytetin e Izraelit javën e kaluar, është bërë virale në rrjetet sociale.
Piktura është postuar në internet nga Alessia Pelonzi, pak ditë pasi fotoja e 16-vjeçarit me sy lidhur, i rrëmbyer nga dhjetëra ushtarë të armatosur izraelitë, u shpërnda në Twitter në mënyrë të stuhishme.
Imazhi u kap nga fotografi Abed Al Hashlamoun në qytetin e Hebronit në Bregun Perëndimor më 7 dhjetor.
Në pikturë, Pelonzi e vë në fokus al-Junaidin, ndërkaq lë në sfond ushtarët të cilët e arrestojnë atë.
Artistja thotë se fotografia ishte mënyra e saj më e mirë për të shprehur solidaritetin me palestinezët.
“Solidariteti është gjëja më e rëndësishme në këto kohëra të errëta, dhe unë besoj se është një nga armët më të fuqishme kundër padrejtësisë”, shpjegoi ajo.
“Ushtarët e rrëmbejnë fëmijën, por gjithsesi mund ta shihni flamurin palestinez në vizatim. Është diçka që nuk mund të heshtet. Ju nuk mund ta fshini identitetin e tyre si një popull nën qilim”, shtoi ajo.
Raportet e fundit të lajmeve njoftuan se gjykimi i të riut është shtyrë deri në javën e ardhshme. Ai është akuzuar për hedhjen e gurëve në drejtim të ushtarëve gjatë protestës, ndërkohë që ai ka mohuar akuzat.
Piktura e Pelonzit përmblidhet në një fjalë: “Palestina”
Sipas Organizatës Palestineze të të Drejtave të Njeriut Addameer, Izraeli arreston, merr në pyetje dhe mban rreth 700 fëmijë palestinezë nga Bregu Perëndimor i pushtuar.
Është vlerësuar se që nga viti 2000, më shumë se 12,000 fëmijë palestinezë janë ndaluar në mënyrë të paligjshme nga autoritetet izraelite.
Në vitet e fundit, shteti okupues i Izraelit është dënuar për kalimin e “Projektligjit për të rinjtë”, i cili lejon ndalimin e fëmijëve deri në moshën dymbëdhjetë vjeçare, nëse ata janë dënuar për “vepra terroriste”.
Ligji ushtarak i Izraelit, i cili aktualisht zbatohet ndaj banorëve palestinez të Bregut Perëndimor të pushtuar nga Izraeli, gjithashtu lejon burgimin e fëmijëve. /tesheshi.com/
