Dashamirët e artit shpesh udhëtojnë nëpër botë në kërkim të një tempulli të ri kulturor për të ushqyer shpirtin e tyre.
Lidhja e parë me artin bashkëkohor për shumicën e udhëtarëve janë ndërtesat e mëdha dhe moderne prej xhami në qendrat e qyteteve, por Muzeu Baksi është një përjashtim nga ky rregull i pashkruar.
Nëse fryma juaj e aventurës ju çon në rajonin e Detit të Zi të Turqisë, duhet ta vizitoni këtë vend. Muzeu Baksı ndodhet në majë të një kodre, 45 kilometra nga qyteti i Bayburt, ku fjala Baksı fjalë për fjalë do të thotë “shërues, ndihmës, mbrojtës”.
Një ndërtesë e pazakontë, e ngjashme me një anije kozmike, ngrihet në fshatin Bayraktar, i njohur dikur si Baksı. Banorët vendas thonë me krenari se është këtu që arti dhe tradita bashkëkohore jetojnë së bashku, dhe kompleksi
përfshin salla ekspozite, punëtori, një sallë konferencash, një bibliotekë dhe shtëpi pritjeje.
Një projekt i pazakontë por i suksesshëm u krijua falë idesë së artistit turk Husamettin Kocan.
Koçani ka lindur në Bayburt, ka konkurruar në Austri, ka ekspozuar veprat e tij në mbarë botën dhe më pas ka vendosur ta kthejë jetën në vendin ku është rritur.
Iniciativa për muzeun u krijua në 2005 me themelimin e Fondacionit të Artit dhe Kulturës Baksı. Qëllimi i Koçanit ishte mbi të gjitha të tregojë trashëgiminë artistike të rajonit, si dhe veprat bashkëkohore të artistëve vendas.
Ndërtimi i objektit kryesor të muzeut përfundoi në vitin 2010 dhe është e rëndësishme të theksohet se
Koçani arriti ta financojë privatisht këtë projekt, që është vërtet i rrallë.
Kompleksi i muzeut të artit është i përqendruar në dy ndërtesa. Ndërtesa e parë shërben si pjesa qendrore e kompleksit dhe e dyta është në formën e një depoje. Brendësia e ndërtesës kryesore është e gjerë dhe e thjeshtë, dhe si e tillë paraqet një hapësirë të përsosur për ekspozita dhe instalime artistike.
Gjysma e parë e ndërtesës së depos përdoret kryesisht për ekspozita më të vogla ku ekspozohen veprat e artistëve apo studentëve vendas. Gjysma tjetër e depos përmban artizanat tradicional magjepsës kryesisht nga rajoni i Detit të Zi.
Qëllimi i muzeut është të promovojë trashëgiminë kulturore dhe edukimin e vazhdueshëm për brezat e
ardhshëm. Gjithashtu, Baksi synon të ringjallë Bayburtin, i cili ndikohet negativisht nga migrimi, si dhe të stimulojë ekonominë në rajon përmes artit.
Rëndësia e këitj muzeu njihet në mbarë botën dhe ndër çmimet e shumta spikat çmimi prestigjioz i Muzeut i Këshillit të Evropës, i cili iu dha në vitin 2014.
Duke marrë parasysh vendndodhjen e largët të Muzeut Baksı, kompleksi përmban gjithashtu 26 dhoma të vogla ku vizitorët mund të qëndrojnë.
Apartamentet janë të frymëzuara nga trashëgimia artistike e rajonit dhe mund të strehojnë deri në 52 persona, gjë që është një mundësi e shkëlqyer për vizitorët në grupet turistike.
Përveç kësaj, Baksi ka edhe një restorant fantastik me një tarracë të jashtme me pamje nga lumi Çoruh, ku mund të gjeni kohë për të ngrënë një drekë të lehtë ose për t’u çlodhur nën diell me një gotë çaj turk. /tesheshi.com/
