Kryeprokurja e përkohshme, Arta Marku vijon sërish të jetë shkak për përplasje mazhorancë – opozitë, më shumë se dy muaj pas zgjedhjes në krye të organit të akuzës. Opozita sërish kërkoi shkarkimin e menjëhershëm të saj, me pretendimin se zgjedhja ka qenë anti-kushtetuese.
Në mbledhjen e komisionit të ligjeve, aty ku u paraqiten amendimet e PD-LSI për ndryshime kushtetuese në zgjedhjen e Kryeprokurorit, deputeti Bylykbashi mbrojti këtë qëndrim: “Duhet t’i ndërpresim mandatin kryeprokurores. Askush nuk e di nëse kryeprokurorja aktuale e kalon vetingun”.
Por kolegu i tij po ashtu jurist, Ulsi Manja nga mazhoranca, ofroi tjetër argument:. “Shqipëria sot ka Prokuror të Përgjithshëm të zgjedhur sipas Kushtetutës, që ushtron detyrën deri në zgjedhjen e prokurorit të ri konform Kushtetutës. Nuk jemi në Konflikt me Kushtetutën. Kuvendi është në respektim të Kushtetutës dhe të ligjit. Dispozita tranzitore e Kushtetutës nuk e ka zgjidhur rastin e vakancës së krijuar në mbarimin e mandatit të Prokurorit të Përgjithshëm, siç e ka zgjidhur për organet e tjera kushtetuese. Këtë e ka bërë ligji numër 97, 2016 për prokurorinë”, theksoi Manja. /tesheshi.com/
