Nga Blendi Gashi
Dy partitë në koalicion; PDK-LDK, që pas mbarimit të luftës, konsiderohen si “armiq” të mëdhenj mes vetes për ato çka në vazhdimësi kanë hedhur akuza ndaj njëra-tjetrës.
Përkundër kësaj “lufte” këto dy partitë janë “kurorëzuar” mes vete duke lidhur koalicion qeverisës, siç thonë në vazhdimësi “për ndërtimin e shtetit dhe mirëqenien e qytetarëve”.
16 vite pas ka mbaruar kjo “luftë” mes tyre dhe tani po jetojnë në një kohë lumturie.
Por, LDK nuk po arrin assesi të gjej paqen. Partia e drejtuar nga Isa Mustafa, ka kohë që ka nisur një “luftë” të re, tashmë me një subjekt tjetër, bëhet fjalë për Lëvizjen Vetëvendosje, partinë e parë opozitare në vend.
Që nga humbja e Prishtinës që LDK e udhëheqi për 14 vjet, kjo parti tashmë si “armik” kryesor sheh Vetëvendosje-n dhe jo më PDK-në, të cilën parti eksponentë të LDK-së e akuzuan edhe për varsjen e zyrtarëve të saj.
Se ka filluar një luftë e re politike mes LDK-së dhe VV-së këtu aspak nuk ka dyshime.
Partitë në fjalë pothuajse çdo ditë hedhin akuza të mëdha ndaj njëra-tjetrës.
Aq larg ka shkuar armiqësia sa në një nga seancat e fundit, deputeta e LDK-së Besa Gaxheri e quajti VV-në “organizatë terroriste”.
Sondazhi që e lë në paqe PDK-në, por në “luftë” LDK-në e VV-në
Ndërsa, në vitet e pasluftës PDK dhe LDK përplaseshin keq me njëra-tjetrën edhe për sondazhet që publikoheshin në prag të zgjedhjeve, se kush do të dal e parti e parë, tashmë përplasja për këtë çështje është bartuar mes LDK-së dhe VV-së.
Një sondazh i pbulikuar së fundmi nga kompania “Ubo Consulting” (që LDK thotë se është e njerëzve të VV-së) me bazë në Prishtinë në të cilin të pyeturit janë përgjigjur; se për cilin subjekt politik apo lider politik do të votonin nëse zgjedhjet do të mbaheshin në një të ardhme të afërt.
Në këtë sondazh, 24.1 % e qytetarëve janë deklaruar se do të votojnë për Partinë Demokratike të Kosovës (PDK), ndërkaq 23.3 % e tyre kanë thënë se do të votojnë për Lëvizjen Vetëvendosje, kurse LDK-ja ka dalë e treta me 19.7 për qind.
Pra, sondazhi në fjalë parashikon ngritje enorme të VV-së duke e renditur si parti të dytë në vend, derisa LDK-ja nxjerret si parti e tretë.
Kjo ka bërë që LDK të reagoi ashpër dhe të drejtoi shigjetat drejt VV-së se ka porositur një sondazh të tillë.
“UBO Consulting është kioska e cila më së paku ka të bëjë me hulumtimin e opinionit. Uliks Osmani ( burri i Arlinda Osmanit) është pronar i UBO Consulting apo sondazheve me tendera përveç kësaj është mik dhe rregullon leje së bashku me Ilir Gjinollin , mikun e Shpend Ahmetit. Ilir Gjinolli dhe Arlinda Osmani (gruaja e pronarit të UBO) dy pronarët e Studios së Arkitekturës Urban Plus e cila studio vazhdimisht shpërblehet me tender nga Komuna e Prishtinës”, thuhet në reagimin e LDK-së.
Partia që drejtohet nga kryeministri Isa Mustafa më tej është shprehur se sondazhi i vetëm për parti qeverisëse janë zgjedhjet dhe vota e qytetarëve.
Por, ndaj akuzave të LDK-së se sondazhi është porositur nga VV ka reaguar kjo e fundit duke thënë se partia e Isës, është në panik nga rënia e mbështetjes së qytetarëve dhe nuk po mund të kuptojë humbjet e mëdha në elektorat, andaj edhe po shpif e akuzon.
“LDK-ja e Isa Mustafës, tashmë e ka shndërruar në traditë shpifjen dhe akuzën, ndaj kujtdo që ia thotë të vërtetën. Qoftë ndaj medieve, qoftë ndaj kompanive të ndryshme që masin opinionin pubik dhe qoftë ndaj qytetarëve.
Në vend që të kërkojë sqarim nga kompania që kishte realizuar këtë sondazh, dhe të kërkojë të dijë parametrat, metodën e punës, etj. që ta analizojë nëse ky sondazh është serioz dhe shkencor, LDK e Isa Mustafës ka vendosur ta denoncojë atë pa pasur asnjë informacion, dhe të tentojë në mënyrë absurde ta lidhë këtë sondazh me Lëvizjen Vetëvendosje.
LDK-ja e drejtuar nga Isa Mustafa është në panikë të madhe pikërisht ngase po e di që ky dhe sondazhet e tjera të kohëve të fundit janë të vërteta”, thotë VV.
Megjithatë, për të kuptuar saktë nëse sondazhi është apo jo i porositur dhe se a do ta fundos VV dikur partinë më të madhe në vend LDK-në në vendin e tretë, padyshim se një gjë e tillë saktë mund të kuptohet vetëm kur të mbahen zgjedhjet parlamentare.
/tesheshi.com/
