Nga Ylli Pata
Zbulohen arsyet përse Presidenti i Kosovës, Hashim Thaçi ka insistuar prej kohësh një nderim nga qyteti i Shkodrës, i cili tashmë është kthyer në “kryeqendrën” shqiptare të Kosovës, duke qenë se kombëtarja e futbollit e këtij shteti të dytë shqiptar në rajon, do t’i zhvillojë të gjitha ndeshjet në stadiumin “Loro Boriçi” të qytetit më të madh verior.
Prej dy vitesh, Edi Rama dhe Hashim Thaçi kanë vendosur që Shkodra të jetë porta shqiptare e kosovarëve, dhe kjo natyrishëm që do të rrisë edhe më shumë preferencën e tyre për Velipojën dhe resurset turistike të “djepit të kulturës” shqiptare.
Por, kjo histori ka më shumë se kaq prapaskena dhe duket si një veprim i menduar prej kohësh.
Hashim Thaçi është shpallur prej shumë vitesh “Qytetar Nderi” i Vlorës, nderim i bërë nga socialistët që kanë gjithmonë bashkinë atje – të cilët e shfrytëzojnë më së miri simbolikën e qytetit të pavarësisë – por edhe me preferencën e Thaçit për pushime në qytetin e jugut, si edhe për shkak të afërsisë PS-PDK.
Siç mësohet, këshilltari i vjetër i Thaçit në distancë – tashmë këshilltar edhe zytar-gazetari Bedri Islami, i cili jeton në Gjermani por që është nga qyteti i Shkodrës – ka qenë partizan i nderimit të Thaçit në Shkodër.
Kjo për disa arsye: në Shkodër në vitin 1918 u themelua Komiteti “Mbrojtja Kombëtare e Kosovës”, ku për herë të parë në mënyrë institucionale përmendej fjala Kosovë nga një organizatë e shtetit shqiptar të krijuar nga Konferenca e Londrës.
Komiteti “Mbrojtja Kombëtare e Kosovës” u themelua në ilegalitet të plotë më 1 maj 1918 dhe më 7 nëntor 1918 u vendos përfundimisht në Shkodër nga figurat të shquara atdhetare si Bajram Curri, Hoxha Kadri Prishtina, Sali Nivica, Hasan Prishtina, Bedri Pejani, Qamil Bala, Sali Rama, Hafiz Ismet Dibra etj. Qëllimi parësor i kësaj organizate politike kombëtare ishte mbrojtja e shtetit të pavarur shqiptar, për demokratizimin e tij, për çlirimin e Kosovës dhe të viseve të tjera shqiptare të Jugosllavisë, që ishin të shkëputura padrejtësisht më 1913 dhe për bashkimin e tyre me Shqipërinë.
Edhe në vitin 1990, po në Shkodër u themelua shoqata atdhetare politike “Kosova” që solli Rexhep Qosen në Shkodër nga një pjesë intelektualësh shkodranë(duhet thënë kryesisht muslimanë).
Kjo shoqatë u etiketua fort nga pushteti i PD-së në ato vite si “marksiste” pasi kishte lidhjet e saj me rezistencën e saponisur të Kosovës.
Bedri Islami, nga Shkodra shkoi në Gjermani për të drejtuar e organizuar organizatën që gatoi rezistencën e armatosur, si dhe të mbante lidhjet mes shtetit shqiptar dhe UÇK-së.
Por një arsye tjetër e rëndësishme e Thacit për të marrë titullin “Qytetar Nderi” i Shkodrës, është edhe qënia si bastion i Partisë Demokratike dhe, një nderim nga e djathta do t’i jepte Thaçit një mbështetje më gjithëpërfshirëse, për çka vetë Hashimi ka krijuar marrëdhënie të mira me Sali Berishën kur ky i fundit ishte kryeministër në dy mandate.
Ndërkaq, një arsye ndoshta shumë më e rëndësishme se të tjerat, është se Shkodra gjithmonë ka qenë një qytet “qendër” e influencës agjenturore serbe dhe sllave, por edhe të tjera të shumëllojshme.
Përveç minoritetit zyrtar malazez që serbët e quajnë të vetin, në Shkodër prej 100 vitesh kanë gëluar veprimtaritë e agjenturave dhe invluencës ruso-serbe.
Madje një lagje e Shkodrës u banua nga “rusët e bardhë” para 100 viteve, ndaj dhe sot e kësaj dite e ka emrin “Rus”.
Duke përfituar edhe nga diversiteti religjoz, social dhe demokrafik, qyteti i madh i veriut ka qenë një terren pjellor për rrymat e nëndheshme të shërbimeve që kanë përdorur krimin për ta sunduar dhe mbajtur influencën e tyre.
Kohët e fundit ka pasur alarm se influenca ruse po shtohet shumë në Shkodër, duke tentuar edhe blerjen e pronave sidomos në bregdetin e Velipojës dhe Rrjollit.
Ndaj dhe lëvizja e Ramës dhe e Thaçit me “Loro Boriçin” si arenë e kombëtares së Kosovës, synon ta bëjë Shkodrën në një “Gjakovë të dytë” duke nisur edhe nga afërsia kulturale.
Synimi është që kjo zonë të jetë “Kosova Perëndimore e Republikës së Shqipërisë”, ku pritet që të përnqëndrohen edhe investimet në bregdetin e Velipojës. /tesheshi.com/
