Monika Kryemadhi ka thirrur me një lehtësi proceduriale organin më të lartë të partisë, e cila e zgjodhi pas zgjedhjeve në krye të partisë së Ilir Metës, duke kryer rokadën e “regjentit” Vasili.
Në dukje, Konventa e LSI-së u mbodh për t’i dhënë mandatin kryetares që të legalizojë aleancën politike me Partinë Demokratike, e cila tashmë do të kthehet në aleancë elektorale në çdo moment zgjedhor që të vijë; rregullisht që në zgjedhjet vendore të vitit 2019, të cilat për t’u përgatitur do të nisin që në janarin e 2018-s.
Por realisht, kryetarja e LSI-së thirri organin më të lartë të partisë së saj për të demonstruar një provë “force”, por edhe për të testuar njerëzit e LSI-së që kanë dhënë shenja se kanë nisur një fazë të fuqishme eksodi.
Humbja e “tepsisë” në zgjedhjet e 25 qershorit ka shkaktuar një tronditje të madhe në forcën politike që është projektuar si një grupim pragmatist, duke lëvizur sa në aleancë me Partinë Demokratike e sa me atë Socialiste.
Dhe pikërisht këto aleanca i kanë dhënë LSI-së “ushqimin” për militantët-lëvizës, të cilët janë kthyer në mekanizmin fitues të kësaj partie për të shtuar votuesit.
LSI, pas uljes drastike që pati në vitin 2009, arriti të fuqizohej në zgjedhjet vendore të 2011-s, sidomos në Tiranë, pas një aleance të fortë me PD-në ku Lulzim Basha i dha partisë së Metës një “pjesë të madhe torte” të Bashkisë së Tiranës.
Në 2013-n, Ilir Meta hyri në aleancë me Edi Ramën vetëm pasi arriti të merrte rreth 40% të të gjithë “tepsisë” së pushtetit nga qendra në bazë, të cilën në zgjedhjet vendore të vitit 2015-s e konsolidoi.
Por tani, duket se ka ndodhur një ngërç real në strukturat e LSI-së që nuk përgjigjeshin prej kohësh sipas sistemit klasik të ROGL-së, pra njëri lajmëron tjetrin, ai dikë tjetër, duke formuar një zinxhir perfekt organizativ që përveç aktivizimit direkt përkthehej edhe në kontribute financiare të dhëna nga militantët.
Ndërsa PS, me marrjen e pushtetit tek-pullë, po përdor një taktikë të lashtë sa bote: “divida e impera”, duke seleksionuar me kujdes shumë kirurgjik militantët e LSI-së.
Ndërsa janë larguar menjëherë të gjithë drejtorët e mëdhenj që u propozuan nga partia e Metës 4 vjet më parë, ende nuk ka nisur “fshesa” e pjesës tjetër që është më voluminozja.
Siç mësohet, kjo është taktikë që mund të përkthehet edhe si një ofertë ndaj nëpunësve të emëruar nga LSI-ja, një pjesë e konsiderueshme e të cilëve nuk janë të lidhur shpirtërisht me partinë e drejtuar nga Monika Kryemadhi, por thjesht për pragmatizëm.
Dhe kreu-grua i LSI-së, si për të vënë në provë “besnikërinë” e militancës, thirri në Konventën e së dielës pikërisht atë pjesë të administratës që ka përfituar nga punësimi dhe që nuk ndodhet në pjesën e lartë të emërimeve.
Siç mësohet u thirrën për t’u provuar pikërisht njerëzit e emëruar kohët e fundit, ata pak para zgjedhjeve, dhe kjo ka qenë një testim për të parë kush po bëhet gati të iki dhe kush mund të rrijë.
Dhe në këtë pjesë është zhvilluar një duel në distancë me PS-në, pikërisht që të trazojë ujrat e militancës së LSI-së.
Pjerin Ndreu, një deputet i PS-së në qarkun Lezhë, i cili ka qenë një nga themeluesit e LSI-së por që ka ikur nga partia e Metës që në vitin 2009, në zgjedhjet e fundit përplasjen më të madhe në qarkun e tij e zhvilloi me LSI-në dhe Ilir Metën, i cili shkoi direkt madje me eskortë Presidenti në Lezhë, ku përmendi edhe “armatosjen” e popullsisë.
Në një postim në faqen e tij, pikërisht ku pro zhvillohej Konventa, Ndreu shkruajti: “Kjo koha e sotme ka risi, sepse qeveria mbush sallat e konventave ku villet vrer kundra saj me te punesuarit e administrates se vet ! Thuhet se ka ikur koha e kesaj dhe asaj, por ne fakt koha e askujt s’ka ikur. Ata jane aty, te qete dhe helmues duke duartrokitur ne konventa, te trashur me rrogat e shtetit ! Tepsia qenka e forte dhe rezistente, nuk tundet nga fjalet !”
Një mesazh i fortë e i qartë për ata që kanë zbatuar urdhrin e Kryemadhit.
Vetë LSI, për të mbajtur të karikuar militancën e saj po përdor taktikën se “ka mundësi të forta dhe fuqi edhe presidenciale për të rrëzuar Edi Ramën” dhe së shpejti do të ketë qeveri tjetër ku LSI do të marrë sërish në dorë të ashtuquajturën “tepsi” që Edi Rama e ktheu në eufemizëm.
Duke firmosur aleancën me PD-në, që virtualisht rrisin potencialin për një riardhje në pushtet, LSI mund të mbajë ende një pjesë të militantëve në këmbë, sidomos ata që i ka marrë nga radhët e së djathtës. Por kjo rrezikon atë pjesë mbështetësish që kanë ardhur nga e majta.
Sërish edhe këtu LSI po “peshkon” të pakënaqurit brenda PS-së që nuk janë punësuar në administratën publike.
Sidomos në bazë po zhvillohet një betejë e fortë, nga njëra anë prej PS-së për të shkaktuar një eksod nga LSI-ja dhe nga partia e Kryemadhit për ta ndaluar atë.
Pikërisht ky ka qenë edhe shkaku real i Konventës së LSI-së dhe jo miratimi i dokumenteve apo raporteve.
Kjo në partitë shqiptare është një formalitet që mbyllet për 3 sekonda… /tesheshi.com/
