Një heshtje e çuditshme ka ndodhur prej ditës së enjte, kur ish-Kryeministri Sali Berisha trazoi ujërat me deklaratën e bujshmen për armatosjen.
Pas kësaj deklarate ka folur Kryeministri Edi Rama, Ministri i Brendshëm Sajmir Tahiri, kanë lëvizur gjithë diplomatët e perëndimit në Tiranë, por janë prononcuar edhe gazetarë, opinionistë dhe intelektualë.
E vetmja që nuk ka folur ka qenë aleatja e Edi Ramës në qeverisje: Lëvizja Socialiste për Integrim.
As kryetari i Kuvendit Ilir Meta, por as një eksponent sado normal i kësaj partie nuk është prononcuar ndërkohë kur kjo forcë politike përgjithësisht është mjaft e vëmendëshme ndaj zhvillimeve politike të ditës.
Më se paku është indiferencë politike me dashje dhe qëndrim i qartë politik publik.
Duke u krahasuar me qëndrimet e fundit dhe të ngjashme të LSI-së me zhvillimet e ardhura nga deklaratat e PD-së, mund të analizosh fare lehtë se nuk ka pasur problem prononcimi apo dhënia e një qëndrimi nga ana e LSI-së.
Por këtë radhë, jo vetëm qëndrim publik nga selia e LSI-së nuk ka pasur, por as prononcime në media ku të përmendet deklarata e armëve.
Madje as në postimet e tyre në FB, eksponentë të njohur fejsbukistë të LSI-së nuk kanë dhënë ndonjë qëndrim. Përveç ndonjë shakaje artistike të Dylgjerit, i cili komunikimin publik nuk e ka më në statusin e një përfaqësuesi të LSI-së.
Që prej vizitës së Edi Ramës në Shtëpinë e Bardhë qëndrimet e LSI-së kanë qenë më shumë se detante me selinë blu, në mënyrë të veçantë me doktorin për të cilin Ilir Meta ka shfaqur komplimente më shumë se një herë./tesheshi.com/
