Hulumtimet e bëra nga një ekip i psikologëve dhe ekonomistëve, kanë dhënë një shpjegim në lidhje me atë se në çfarë mënyre e përjetojmë ne lumturinë. Në një studim të kryer në vitin 1999, të quajtur “Të ndjekurit dhe kërkimi i lumturisë mund të sjellë deri te një vetë-disfatë,” Jonathan Schooler, nga Universiteti i Santa Barbara të Kalifornisë, Dan Ariely nga Duke University dhe George Loewenstein nga Carnegie Melon ofrojnë dëshmi se, ata që planifikojnë të kalojnë një kohë mirë në prag të Vitit të Ri ka të ngjarë që për ta, ajo të jetë më e mjera prej gjitha netëve tjera të vitit.
Në javët që shpijnë deri në prag të Vitit të Ri, studiuesit kanë anketuar 475 njerëz në lidhje me planet e tyre për natën e Vitit të Ri – nëse ata do të festojnë, sa do të jetë e madhe ndeja, se sa kohë dhe të holla do të shpenzojnë në përgatitjen e ndejës, dhe sa janë pritjet e tyre që do të kënaqen atë natë. Më pastaj, ata kanë kontaktuar të njejtit njerëz disa javë pas Vitit të Ri, dhe ua kanë shtruar atyre të njëjtat pyetje.
Studimi ka gjetur se një përqindje e madhe prej 83 për qind të të anketuarve dolën të zhgënjyer me festimin e Vitit të Ri. Dhe njerëzit më të zhgënjyer dolën të ishin pikërisht ata që kishin pritjet më të larta.
Ata që kishin pritjet më të mëdha në prag të Vitit të Ri dolën të jetë më të zhgënjyerit, pastaj ata të cilët kishin planifikuar një organizim më të vogël, dhe fare në fund më së paku apo fare nuk dolën të zhgënjyer ata të cilët nuk kishin planifikuar asgjë për këtë natë. Në mënyrë të ngjashme, ata që kishin parashikuar se do ta shijojnë më së shumti natën e Vitit të Ri dhe kishin kaluar më së shumti kohë në organizim, kishte shumë më të ngjarë të thonë se ata ishin ndarë më të zhgënjyerit pas kësaj nate.
Studiuesit nuk janë të sigurt se pse ka ndodhur kjo. Megjithatë, një studim tjetër që ata kryen në të njëjtën kohë, mbështet idenë se përpjekja që të ndihemi të lumtur është një nga mënyrat më të shpejta për të prishur përjetimin tuaj (të asaj ngjarjeje).
Studiuesit nuk janë të sigurt nëse ata që kishin shpresa të mëdha për natën e Vitit të Ri përfunduan të zhgënjyer, për shkak se ata gjithë kohën janë përpjekur që të jenë të lumtur dhe gjatë gjithë kohës kanë monitoruar emocionet e tyre atë natë, por ata thonë se ky supozim ka të ngjarë të jetë bindës.
Pse ndodh kjo? Hulumtuesit thonë se kjo mund të ngjajë për shkak se monitorimi i lumturisë suaj në fakt largon vëmendjen tuaj larg nga aktiviteti, e lë atë në hije, duke të larguar nga përjetimi. Dhe është gjithashtu e mundshme që, shpresa e madhe për të arritur lumturinë mund të inkurajojë dikë që të bëjë krahasime të pafavorshme në mes të asaj që ai përjeton dhe një lumturie ideale, të imagjinuar të lumturisë, e cila mund të çojë në zhgënjim.
Hulumtimet psikologjike të bëra një dekadë e gjysmë pas këtij studimi mbështesin idenë se, kërkimi i lumturisë mund të sjellë paradoksalisht deri te vetë-disfata.
Studimet e fundit kanë treguar se njerëzit që janë kronikisht të lumtur janë më pak meditues, ndërsa njerëzit që janë kronikisht të pakënaqur janë më të vetë-ndërgjegjshëm dhe vetë-përqendruar. Studimet mbi lumturinë dhe egoizmin tregojnë rezultate të ngjashme: njerëzit egoistë janë më të përkushtuar ndaj lumturisë së tyre, por duket të jenë më pak të lumtur në përgjithësi.
Studiuesit thonë se gjetjet e tyre rreth Vitit të Ri nuk janë thirrje për të braktisur ndejat dhe organizimet, por janë thirrje për menaxhimin e pritjeve tuaja dhe fokusimin në shijimin e përjetimeve tuaja gjatë kohës sa i keni ato.
Schooler, autori kryesor i studimit, thekson se këto studime psikologjike përshkruajnë tendencat, jo përvojat individuale. “Edhe në studimin tonë, edhe pse ka pasur një trend ku njerëzit që kanë organizuar ndeja më të mëdha dhe janë ndarë më të zhgënjyerit, ka pasur gjithashtu shumë njerëz që kanë organizuar apo kanë marrë pjesë në një ndejë të madhe dhe kanë kaluar kohë të mirë,” thotë ai.
Por sigurisht, ky është një argument që të mos e çani aq shumë kokën tuaj apo që të mos ju gërryejë ndjenja e fajit se, në qoftë se në vend të ndonjë organizimi të madh, ju vendosni ta kaloni natën e Vitit të Ri në shtëpinë tuaj në pizhame si çdo natë tjetër.
Marrë nga The Independent dhe Washington Post
Përktheu tesheshi.com.
