Duket si enigmë se pse europianët, qoftë edhe Angela Merkel apo liderët e Brukselit po presin vettingun, pra pastrimin e drejtësisë shqiptare.
Siç mësohet, nuk bëhet fjalë për një utopi apo thjesht një koncept të përgjithshëm, por vettingu po mban peng një operacion shumë të madh që ka të bëjë me çlirimin e ekonomisë shqiptare, kryesisht pasurive të patundshme nga paratë e drogës.
Java e fundit ka qenë një frenezi e vërtetë për arrestimin e bandave shqiptare të drogës në Europë. I nisur një muaj më parë, superoperacioni i drejtuar nga DEA amerikane dhe EUROPOL ka arritur kulmin e saj. Një burim diplomatik që merret më luftën ndaj krimit të organizuar, i tha tesheshi.com se bëhet fjalë për kulmin e një aksioni që pritet të mbyllë fazën e parë në fund të dhjetorit.
Janë arrestuar mbi 300 anëtarë të organizatave më të rëndësishme të narkotrafikantëve shqiptarë në Greqi, Itali, Hollandë, Spanjë, Gjermani e Belgjikë.
Gjithçka është arritur falë pendimit të disa kokave të rëndësishme të këtyre bandave të cilët kanë pranuar të bëhen dëshmitarë të drejtësisë.
Burimi diplomatik është shprehur optimist se çdo gjë po shkon drejt parashikimit dhe po shkohet drejt “kokës së vërtetë” të zullumit, e cila ndodhet shumë lart në elitën e Tiranës.
Një grup ekspertësh nga vendet eruopiane, dedektivë dhe prokurorë kanë ardhur në Tiranë prej një jave dhe po investigojnë të gjitha pronat e patundshme të bandave të drogës, ku bëhet fjalë për shifra që i kalojnë 30 milionë eurot. Kjo shifër ka të bëjë vetëm me pjesën e parë të “tortës së zënë” e cila është arritur të kodifikohet me vështirësi, pasi është e futur në emra dhe dokumente të rremë e të fshehur në skuta ligjore.
Ajo që është e rëndësishme, ka të bëjë me zonën ku ndodhen investimet e mëdha të narkotrafikantëve shqiptarë; pikërisht në zonën e bregdetit shqiptar.
Nga Velipoja e deri në Sarandë janë identifikuar gjithçka: resorte, pallate, hotele, markete, mjedise sportive; të gjitha të investuara nga paraja e drogës.
Por siç mësohet, nisja de jure e sekuestrimit nuk do të bëhet tani dhe nga kjo prokurori që drejtohet nga Adriatik Llalla.
Europianët e kërkojnë vettingun pikërisht për të nisur fazën më të rëndësishme të operacionit: çlirimin e ekonomisë shqiptare nga pesha e krimit të organizuar.
Çdo ndërtesë e bërë me para droge do të sekuestrohet dhe do të rishitet në një procedurë krejt të hapur dhe të përcaktuar nga një rregull i qartë.
Por sekuestroja do të bëhet duke mos rrezikuar pjesën tjetër të operacionit; pasi siç tha burimi diplomatik, qoftë dhe sikur një segment i operacionit të hasë pengesë, ka rrezik të prishet gjithçka.
Madje ka informacione se kanë nisur shitjet dhe dhurimet e pronave që janë përfituar nga droga. Por siç mësohet asnjë nga këto operacione nuk do të pengojë sekuestron, edhe pse do të jetë shumë e vështirë.
Arsyeja pse hetuesit ndërkombëtarë presin vettingun, është pikërisht ardhja në organet e drejtësisë e njerëzve të rinj që nuk do të pengojnë me vonesa e artifica ligjore një proces që realisht është më i madhi që ka ndodhur në historinë e luftës ndaj krimit të organizuar në Ballkan.
Paralelisht me pronat e tyre në Shqipëri, do të nisë edhe sekuestrimi i pronave në vendet e Europës, i cili nuk është problem që të ekzekutohet që tani, por droja është se mos dekonspirohet operacioni i madh. /tesheshi.com/
