Kryeministri Rama pati një takim me rektorët e universiteve në vend, diktuar nga protesta e pedagogëve që kërkojnë rritje rroge, deri dhe duke bojkotuar mësimdhënien.
Rama i qëndroi të tijës, asaj që rritjen e pagës ta mundëon autonomia, e dhënë nga Ligji i Arsimit të Lartë.
“Ne patëm një debat me rektorët për çështjen e pagave. Bota akademike është ndryshe, s’janë gjimnaze as shkolla 9-vjeçare që mbahen me pagën e shtetit.
Universiteti duhet ta ketë pjesë të ADN-së së vet thithjen nga tregu, të jetë aktor i tregut, të thithe fonde për kërkimin shkencor etj etj.
Autonomia sjell liri por edhe përgjegjësi. Është hera e fundit që ne rrisim pagat në mënyrë uniforme, do të rrisim për ata që do të arrijnë t’u mësojnë më shumë universiteteve. Dhe padyshim do këtë rritje page të kombinuar, jo nga studentët por nga futja e universiteteve si aktorë në treg. Kampuset universitare, nuk janë fjetore, por janë hapësira ku takohet universiteti me biznesin dhe tregun”, arsyetoi i pari i qeverisjes.
Nga ana tjetër, pedagogët protestues vijuan rezistencën e tyre në rrugë, para godinave universitare, duke vendosur për bojkot të plotë të auditoreve.
“Vetëm përmes këtij qëndrimi do t’i rikthehet dinjiteti arsimit të lartë dhe universitetit në vend. Misioni akademik vazhdon. Të gjitha orët mësimore do t’i zëvendësojmë”, tha drejtuesi i sindikatës së pedagogëve, Aleksandër Kovaçi.
Pedagogët protestues kërkojnë rritje prej 50 përqind të pagës. /tesheshi.com/
