Palët në Kuvend kanë akuzuar njëra-tjetrën për klientelizëm, ndërsa diskutohet projektligji për Arsimin e Lartë, në një seancë të posaçme.
Argumentet e Qeverisë, përmes ministres së Arsimit, Lindita Nikolla janë fokusuar në faktin se projektligji është hartuar nga ekspertët e fushës dhe në këtë process nuk janë ngatërruar këtë herë as Qeveria dhe as Opozita. Mirëpo, nuk ka qenë e këtij mendimi deputetja demokrate, Jorida Tabaku e cila e cilësoi projektligjin sit ë hartuar nga interesa klienteliste.
Nikolla ka reaguar menjëherë duke thënë se Opozita ka interesa klienteliste në kundërshtimin e saj, duke iu referuar disa individëve pranë Opozitës që kanë lidhje me universitetet.
Ndërkaq, studentët dhe komuniteti i pedagogëve që kundërshtojnë ligjin mbajtën protestë përpara godinës së Parlamentit, për të kundërshtuar reformën në arsimin e lartë. Ata akuzuan të dyja palët për këtë reformë, të cilën ata e cilësojnë si vdekjen e arsimit publik në Shqipëri.
“Protestat, zaptimet, bllokimet dhe përplasjet e drejtpërdrejta me dhunën simbolike dhe konkrete qeveritare kanë për të qenë më të shpeshta e më të forta. O universitetet, o pushtetarët klientelistë. O ne, o qeveria”, kanë thënë protestuesit ndër të tjera.
Në lidhje me këto protesta, ministrja Nikolla ka pasur përgjigje, pasi ajo mendon se ata po shantazhojnë Kuvendin më kot.
“Nuk mund të na ndalë një grup i vogël që përpiqen të shantazhojnë Kuvendin se nëse kalon ky projektligj sot, atëherë është fundi i arsimit të lartë. Të nderuar profesorë dhe pedagogë, më keq se ç’ka qenë dhe ç’e keni bërë nuk do të bëhet më”, deklaroi Nikolla. /tesheshi/
