“Topçinjtë” kanë sezone të tëra që nuk bëjnë paraqitje të mira, por këtë herë po shkon akoma më keq për ta. Mirë që nga lufta për titull kanë dalë prej kohësh, por tani rrezikojnë të mbeten dhe jashtë katërshes së parë të klasifikimit të Premier League-s, prej nga mundësohet pjesëmarrja në Champions League.
Më e fundit humbje ka ardhur mbrëmë, kur Arsenali është turpëruar në transfertë nga një ekip si Kristëll Pallasi, duke u mundur 3-0.
Një rekord negativ për Arsene Wenger-in, që për herë të parë në mbi dy dekada te Arsenali humb katër ndeshje të njëpasnjëshme në kampionat në fushë kundërshtare. Diçka që kishte ndodhur për herë të fundit në vitin 1995, pak para ardhjes së francezit.
Dhe për më shumë, Arsenali në të katër humbjet ka pësuar nga tre gola; duhet të kthehesh në 1929-n për të ndeshur të njëjtën statistikë!
I vetmi ngushëllim mbetet fakti se i njëjti ekip, Kristëll Pallasi, pati mundur dhe Çelsin 1-2 të shtunën e 1 prillit në “Stamford Bridge”.
Me 54 pikë, në vend të gjashtë, Arsenali ka një malore për të ngjitur në tetë ndeshjet e mbetura në kampionatin anglez. Veç kësaj, një hall tjetër është e ardhmja e Arsene Wenger-it. Tifozët më nuk e duan, ndërsa ai është i prirur të qëndrojë.
“Sonte nuk jam në humor për të folur për të,” u thoshte gazetarëve një natë më parë Wenger pasi kishte parë ekipin e tij të poshtërohej nga Kristëll Pallasi. /tesheshi.com/
