“Topçinjtë” i kanë dhënë fund serisë prej 25 ndeshjesh pa humbje të Mançester Junajtedit me një fitore 2-0 pasditen e kësaj të diele, një ndeshje e vlefshme për javën e 36-të të kampionatit anglez.
Një fitore që mund të shihet gjithashtu dhe si një ngadhënjim ngushëllues i Wenger-it mbi Mourinho-n, në sfidat e drejtpërdrejta mes tyre që kanë folur deri më tash veç për portugezin.
Rezultati i jep shpresë Arsenalit që të luftojë për t’u renditur në fund të kampionatit mes katër ekipeve të para, një renditje e përkthyer me pjesëmarrjen në Champions League sezonin e ardhshëm.
Nuk ka qenë sidoqoftë një përballje si të zakonshmet midis këtyre dy ekipeve. Mourinho kishte bërë tetë ndryshime nga ndeshja me Selta Vigon, diçka që e kishtre paralajmëruar më herët. Pos kësaj, Mançesteri nuk u pa asnjëherë që të kishte atë dëshirën e zakonshme për ta vënë nën këmbë Arsenalin. Mjafton një fakt për këtë: vetëm një karton i verdhë në tërë ndeshjen!
Pas një pjese të parë mediokre e pa gola, gjallëri lojës në pjesën e dytë i dha Granit Xhaka me golin e tij në minutën e 54-t. Një goditje nga larg e tij ndryshoi paksa flurudhë kur preku kurrizin e Herrera-s, me topin të bërë të papritshëm për De Gea-n. Vetëm pas tre minutash erdhi dhe goli i Welbeck-ut, që e çoi rezultatin në 2-0.
Përpjekjet e dëshpëruara të Mançester Junajtedit qenë të pasuksesshme në vijim, si për të treguar se mendja ishte te gjysmëfinalja e dytë e Ligës së Europës, që pret për t’u luajtur pas pak ditësh.
Arsenali mbetet në vendin e gjashtë, pas Mançester Junajtedit e me 63 pikë, por nëse fiton të mërkurën ndaj Sauthemptonit, ngjitet më sipër dhe i shton mundësitë për një vend të katërt. /tesheshi.com/
