Java e njëzet e tetë e kampionatit anglez, ndeshjet e së cilës janë luajtur të martën e të mërkurën, nuk ka qenë aspak e mirë për katër ekipet e kreut.
Leicester City do të barazonte të martën në fushën e vet me West Bromwich-in, çka u jepte mundësi rivalëve të reagonin një natë më pas për ta ngushtuar diferencën me të.
Por nuk ka ndodhur kështu. Tottenhami Hotspur-i, që e kishte detyrim fitoren, për t’iu bashkuar më pas
Leicester-it duke u barazuar me pikë me të, ka humbur ndaj West Ham-it. 1-0 ka përfunduar ky takim, me golin e shënuar që në minutën e shtatë nga Antonio. Humbja e lë Tottenhamin aty ku qe, në vend të dytë në klasifikim.
Akoma më keq, Arsenal-i lëshon pe pabesueshmërisht në fushën e vet, në “Emirates Stadium”, ku humbet 1-2 ndaj Swansea City-t. Topçinjtë do të kalonin të parët në avantazh falë golit të Campbell-it në minutën e 15-të, por miqtë do të përgjigjeshin dy herë nëpërmjet golave të Routledge-t dhe Williams-it.
Liverpool – Manchester City u përsërit pas tre ditësh, por këtë herë buzëqeshja është në krahun e liverpulasve, që kanë marrë hak për humbjen me 11-metërsha në finalen e Kupës së Ligës. Fitorja e pastër 3-0 e tregon këtë. Lallana, Milner e Firmino qenë shënuesit e golave.
Vlen për t’u përmendur forma e mirë e dy ekipeve në krizë gjer më tash, Man. United-it dhe Chelsea-t. Manchester United-i fitoi ngushtësisht mbrëmë ndaj Watford-it. Golin në fitoren 1-0 e shënoi Mata në minutën e 83-të. E Chelsea fitoi të martën në transfertë, 1-2, ndaj Norwich City-t.
E shtuna sjell derbin londinez, Tottenham Hotspur – Arsenal. /tesheshi.com/
