Londinezët e Arsenal-it u kualifikuan për në çerekfinalet e FA Cup-it pasi mundën të martën në mbrëmje Hull City-n. Ndeshja e luajtur në stadiumin e Hull-it përfundoi 0-4 për topçinjtë.
Përballja e parë e tyre qe mbyllur 0-0, e në kësi rastesh rregullorja kërkon përsëritjen e takimit, por këtë herë në fushën kundërshtare.
Për Arsenal-in shënuan nga dy gola Giroud dhe Walcott, duke i dhënë një fitore të thellë e të merituar
ekipit të tyre. Arsenal-i do të presë këtë të dielë Watford-in, në takimin çerekfinal të këtij aktiviteti.
Ndërkaq, një numër i vogël mbështetësish të Arsenal-it, të pakënaqur me luhatjet e vazhdueshme të ekipit të tyre, e me pozitën aspak të favorshme në kampionat, teksa skuadra gjendet tetë pikë larg Leicester-it të vendit të parë, kanë shpalosur një banderolë në shkallët e stadiumit ku kërkohej largimi i Wenger-it.
“Arsen, faleminderit për kujtimet, por është koha për të thënë mirupafshim,” shkruhej në të.
“Nuk ka asgjë zhgënjyese për mua; unë bëj punën time,” është përgjigjur trajneri francez i Arsenal-it. “Vështroni historinë e klubit, që kur ai ekziston, dhe do të shihni se nuk kam asgjë së cilës t’i trembem.”
Disi i nervozuar, Wenger do ta mbyllte kështu këtë çështje: “Nuk e vras mendjen. Nuk dua të flas për të, sepse është ngaherë e njëjta histori.”
Arsenal-i nuk e fiton kampionatin anglez prej vitesh, dhe pakënaqësitë ndaj Arsene Wenger-it janë shtuar shumë. /tesheshi.com/
