Teksa ka spekulime të shumta se Arsenali kërkon ta bëjë të tijin mesfushorin e Borusias së Mynshegladbahut në sezonin veror të transferimeve, trajneri francez i topçinjve ka zgjedhur të mos hedhë dritë mbi çështjen nëse një interesim i tillë është i njëmendtë.
Londinezja Evening Standard do të raportonte gjatë fillimit të kësaj jave se ekipi gjerman ku luan Xhaka do të kërkonte më së paku 35 milionë paundë për shitjen e lojtarit, një shumë që duket se Arsenali nuk është i gatshëm ta paguajë.
I pyetur mbi zërat për interesimin për Granit Xhakën, trajneri i Arsenalit ka dhënë një përgjigje që në fakt nuk thotë asgjë: “Nuk mendoj se është koha e duhur për të dalë me emra. Ne nuk diskutojmë emra, por po bëjmë një listë.”
Ironik, Venger është përgjigjur kësisoj kur i është kërkuar nga gazetarët të tregojë nëse Xhaka është në këtë listë: “Do t’ua dërgoj atë!”
Si destinacion i Granit Xhakës në sezonin e ardhshëm janë përmendur më herët dhe Liverpuli e Mançester Siti. Vetë futbollisti me origjinë shqiptare, por që luan për Zvicrën, nuk e ka mohuar dëshirën për të luajtur në kampionatin anglez, diçka të cilën e ka përshkruar si një “ëndërr fëmijërie”. /tesheshi.com/
