Një marrëveshje për evakuimin e menjëhershëm të civilëve dhe luftëtarëve të opozitës nga pjesa lindore e Halepit në Siri u arrit të martën, pas përpjekjeve të vazhdueshme të ndërmjetësimit nga Turqia.
Ministria e jashtme e Turqisë konfirmoi raportet për armëpushim, duke thënë se civilët dhe luftëtarët e opozitës do të zhvendosen në Idlib, sipas marrëveshjes së arritur pas përpjekjeve javë-gjata të Turqisë.
Sipas një zyrtari të lartë qeveritar, i cili foli në kushte anonimiteti për shkak të kufizimeve për të folur për mediat, marrëveshja e armëpushimit u arrit si rezultat i negociatave midis inteligjencës turke dhe ushtrisë ruse.
Ai i tha mediave turke se Turqia dhe Rusia do të shërbejnë si garantues sipas marrëveshjes, e cila do të sigurojë kalim të sigurt për civilët dhe luftëtarët e moderuar të opozitës. Pas arritjes në Idlib nga Halepi, civilët dhe luftëtarët do të jenë të lirë për t’u zhvendosur.
Që nga ora 19:00 , të gjitha veprimet ushtarake në Halepin lindor kanë ndaluar, dhe regjimi i Assadit tani është në kontroll të qytetit, njoftohet gjithashtu.
Sipas marrëveshjes për armëpushim, nuk do të ketë kufizime për kryengritësit e moderuar që lënë Halepin lindor për t’u bashkuar me forcat e moderuaruara të mbështetura nga qeveria turke që aktualisht janë duke luftuar Daesh-in, si pjesë e operacionit “Eufrat Shield”, tha zyrtari.
“Është arritur një marrëveshje për evakuimin e banorëve të Halepit, civilëve dhe luftëtarëve me armët e tyre të lehta, nga zonat e rrethuara të Halepit lindor”, tha Yasser al-Youssef nga zyra politike e grupit kyç Nurredin al-Zinki.
Ai shtoi se marrëveshja është “sponsorizuar nga Turqia dhe Rusia”, dhe do të zbatohet “brenda orëve”.
Një zyrtar nga grupi opozitar sirian, Brigada e Sulltan Muratit, tha se autobusët e parë me njerëz nga Halepi do të largohet natën e së martës ose të mërkurën në mëngjes.
Forcat e regjimit të Assadit të mbështetura nga milicitë iraniane kanë kryer ekzekutime në Halep, duke hyrë nëpër shtëpi dhe duke vrarë disa civilë “në vend”. Kombet e Bashkuara thanë se afro 85 civilë u vranë nga forcat e regjimit të martën, megjithatë, numri i dhënë nga burime lokale është shumë më e lartë.
Rreth 100.000 banorë të qytetit mbeten nën rrethim nga regjimi dhe aleatët e saj në një sipërfaqe prej 8.6 kilometra katror të Halepit lindor.
Gjatë 27 ditëve të fundit, një numër prej 990 civilësh janë vrarë në Halepin lindor nga sulmet e regjimit sirian dhe milicive aleatë, raportojnë burimet lokale.
Përshkallëzimi i fundit vjen në një kohë të përpjekjeve të forcave të regjimit të Asadit të mbështetur nga Rusia, për të rivendosur kontrollin mbi pjesë të Halepit të kapur katër vjet më parë nga grupet e armatosura opozitare.
Siria ka qenë e mbyllur në një luftë civile shkatërrimtare që në fillim të vitit 2011, kur regjimi i Bashar al-Assad ka shtypur me dhunë protestat pro-demokratike – të cilat kishin shpërthyer si pjesë e kryengritjeve të “Pranverës Arabe” – me një egërsi të papritur. /tesheshi.com/
