Kreu i mazhorancës Edi Rama ka arritur të sigurojë votat e opozitës parlamentare për të votuar marrëveshjen e 5 qershorit për Zgjedhoren, arritur me opozitën jashtëparlamentare, me përjashtim të asaj të Murrizit, i cili vijoi rebelimin e tij paçka hapjes së listave.
Mbrëmjen e kësaj të marte u vunë firmat mbi marrëveshjen tjetër, atë që mundëson pjesërisht listat e hapura, që ishte dhe një kusht i brendaparlamentarëve, gati një kauzë e tyre, së cilës i janë përgjigjur Hajdari, Gjoni, Stojku, Musai e të tjerë.
“Me mirëkuptim dhe vullnet të plotë, njëkohësisht angazhohen të:
Mbështesin me votë në seancën plenare të Kuvendit të datës 23 Korrik 2020, Projekt-ligjin ‘Për disa shtesa dhe ndryshime në Ligjin nr. 10019, datë 29.12.2008 ‘Kodi Zgjedhor i Republikës së Shqipërisë’, të ndryshuar, të miratuar me votat e shumicës parlamentare në Komisionin e Ligjeve, në respektim të Marrëveshjes datë 05.06.2020 ndërmjet Partisë Socialiste, opozitës jashtëparlamentare të përbërë nga Partia Demokratike dhe Lëvizja Socialiste për Integrim si dhe deputetes Rudina Hajdari”, është kjo pika ku garantohet vota për 5 Qershorin.
Më pas vjen pika ku mazhoranca angazhohet për ndërhyrje në Kushtetutë, si mundësi e garantimit të listave të hapura, ndonëse pjesërisht, gjë që sigurisht kundërshtohet nga jashtëparlamentarët.
“Mbështesin me votë në seancën plenare të Kuvendit të datës 30 Korrik 2020, Projekt-ligjin ‘Për disa shtesa dhe ndryshime në Ligjin nr.8417, datë 21.10.1988 ‘Kushtetuta e Republikës së Shqipërisë’, të ndryshuar, miratuar me votat unanime të anëtarëve të Këshilli të Legjislacionit dhe Komisionit të Çështjeve Ligjore, Administratës Publike dhe të Drejtave të Njeriut të Kuvendit në mbledhjen e përbashkët datë 14 Korrik 2020;
Vijojnë dialogun midis grupeve parlamentare si dhe të nxisin e mbështesin dialogun midis tyre dhe opozitës jashtëparlamentare, në një proces gjithëpërfshirës me synim arritjen e një dakordësie sa më të gjerë për reflektimin në Kodin Zgjedhor të amendamenteve kushtetuese që përmenden në pikën 2 më sipër”, cilësohet në marrëveshje. /tesheshi.com/
