Dy muaj pas ndërtimit të murit ilegal është arritur marrëveshja për rrëzimin e tij. Ka ndodhur kjo pas orës 2 të mëngjesit të së shtunës, ndërmjet ministrit të Mjedisit, Ferat Shala dhe kreut të Mitrovicës Veriore, Goran Rakiq me ndërmjetësimin e BE-së.
Në kumtesën e qeverisë thuhet se “së bashku, ne kemi arritur një zgjidhje, e cila do të ulë tensionet në veriun e Kosovës, do të ndihmojë lirinë e lëvizjes dhe do të krijojë një ambient të favorshëm për të gjithë qytetarët në veri dhe në jug të Mitrovicës”.
Qeveria thotë se gjatë ditëve në vijim, do të njoftojë publikun me planin e rishikuar për zonën e këmbësorëve, e cila buron nga marrëveshja në kuadër të dialogut të BE-së, që ka të bëjë me projektin e BE-së për urën.
“Ne jemi të vetëdijshëm që çështja ka shkaktuar paqartësi në periudhën paraprake, por jemi kënaqur që të gjithë ne kemi pasur një qasje konstruktive në mënyrë që të përmbyllim këtë çështje në mënyrë të qëndrueshme”, thuhet në kumtesë.
Siç mund të shihet, qeveria nuk tregon datën se kur do rrënohet muri dhe nëse ai do tërhiqet tërësisht.
Mirëpo mediat kosovare kanë publikuar një dokument ku tregojnë se muri do rrëzohet sot ose nesër, ndërsa është paralajmëruar ndërtimi i një projekti të ri që do të nis me 7 shkurt. /tesheshi.com/
