Politikania amerikane, Nancy Pelosi, mendohet të ketë shënuar rekord me fjalimin më të gjatë në Dhomën e Përfaqësuesve të SHBA-së.
Pelosi, udhëheqëse e pakicës demokrate, ka treguar histori emigrantësh për tetë orë. Ajo ka bërë fushatë në mbështetje të emigrantëve pa dokumente, që kanë hyrë në SHBA si fëmijë.
Administrata e presidentit Donald Trump planifikon të shfuqizojë të ashtuquajturën skemë Daca, e cila daton nga koha e ish-presidentit Barack Obama dhe mbron nga dëbimi imigrantët e rinj pa dokumente. Me shfuqizimin e Daca-s, mbi 800,000 veta do të përballeshin me dëbim.
Në mediat sociale, shumë përdorues kanë vënë në dukje se Pelosi, jo vetëm që ka folur për tetë orë, por gjatë kësaj kohe, ajo ka konsumuar vetëm ujë dhe kishte veshur këpucë me taka ta larta.
Megjithatë, një ditë përpara një rreziku të ri për mbylljen e qeverisë amerikane, udhëheqësit e Senatit arritën marrëveshje dypalëshe që do ta mbajë qeverinë federale të financuar për dy vjet. Por për tema të debatueshme, sikurse emigracioni nuk ka ende një marrëveshje. Paketa pritet të rrisë shpenzimet e qeverisë amerikane për mbrojtjen kombëtare dhe programet e brendshme, me 300 miliardë dollarë gjatë një periudhe dyvjeçare, duke i dhënë fund viteve me kufizime të detyrueshme buxhetore, që sipas republikanëve, po e tkurrnin ushtrinë amerikane, ndërsa për demokratët, po dëmtonin njerëzit në nevojë. /tesheshi.com/
