Kylian Mbape është lojtar i PSG. Lajmin e mezipritur e ka njoftuar prestigjozja “Mundo Deportivo” e cila shkruan se është arritur marrëveshja mes Monakos dhe kryeqyetasve.
Sipas informacionit që buron nga klubi parizien, Mbape është blerë për shifrën 180 milion euro, të cilat me bonuse dhe “pluse” të tjera, mund të arrijë deri në 200 milionë. 18 vjecari ka nënshkruar për 5 vjet dhe do të përfitojë 18 milion euro në sezon.
Në këtë mënyrë është mbyllur një tjetër lajm i rëndë i kësaj merkatoje të çmendur. Krahas Neymar që mban rekordin e shitjes me 222 milion euro, në Paris do të luajë dhe talenti botëror i vitit Mbape.
Por tashmë që kanë shpenzuar më tepër se 600 milion euro për të përmirësuar skuadrën, PSG po mendon të shesë disa prej yjeve të vjetshëm, qoftë për të rregulluar disi bilancet, qoftë edhe për shkak se ata do ta kenë të vështirë të gjejnë vend në formacion.
Në listën e të larguarve janë vënë braziliani Lukas Moura që pëlqehet nga Arsenali e Interi, Julian Drakser që pritet krahëhapur nga Dordmundi, Chelsea dhe Juventusi, si edhe argjentinasi Di Maria, për të cilin janë sy e veshë, Inter, Roma dhe Chelsea. /tesheshi.com/
