Ish-kryetari i Komunës së Shtërpcës, Bratisllav Nikolliç, është arrestuar nga Policia e Kosovës, nën dyshime për keqpërdorim të pozitës zyrtare, respektivisht për shkak të dhënies së lejeve ilegale për ndërtim, konfirmoi Prokuroria e Ferizajt.
Shtërpca, është njëra prej gjashtë komunave me shumicë serbe në Kosovë, e cila ndodhet mes Prizrenit dhe Ferizajt.
Nikolliç e drejtoi për disa mandate në këtë komunë, fillimisht nën siglën e Partisë së Pavarur Liberale (SLS), e më pas nën siglën e Listës Serbe.
Gjithashtu, siç shkruan REL, Bratisllav Nikolliç mbante pozitë edhe në organin e përkohshëm komunal në Shtërpcë që financohej nga buxheti i Serbisë. Edhe zyrtarë të tjerë të Listës Serbe mbajnë dy pozita, në sistem të Kosovës dhe atë të Serbisë.
Gjatë aksionit të Policisë së Kosovës, krahas tij u arrestuan rreth 10 persona, mes të cilëve drejtori i Urbanizimit dhe disa zyrtarë e pronarë ndërmarrjesh. Ata dyshohen për veprëm penale të marrjes dhe dhënies së ryshfetit si dhe keqpërdorim të pozitës zyrtare.
Në zgjedhjet e fundit lokale që u mbajtën më 17 tetor, në Shtërpcë fitoi kandidati Dalibor Jevtiç nga Lista Serbe.
Më herët, Jevtiç ishte ministër për Kthim dhe Komunitete në Qeverinë e Kosovës.
Në një reagim ndaj aksionit të Policisë së Kosovës, drejtori i Zyrës për Kosovën në qeverinë serbe, Petar Petkoviç. tha se “u bastisën disa fshatra të Komunës së Shtërpcës dhe u arrestuan disa serbë”, si dhe e përshkroi situatën si “një tentim brutal për frikësimin e popullsisë serbe në Kosovë dhe terror i ri i kryeministrit Albin Kurti”.
“Nën maskë dhe me arsyetimin e njëfarë lufte kundër korrupsionit, Albin Kurti sërish dërgoi njësinë speciale, me përgatitje të plotë luftarake në zonat me shumicë serbe me qëllimin e vetëm që serbët, të cilët mbetën duke mbrojtur interesat tonë kombëtarë, t’i kriminalizojë”, tha Petkoviç. /tesheshi.com/
