Kryeministri, Ramush Haradinaj, ka kundërshtuar arrestimin e ushtarit të FSK-së nga policia serbe në vendkalimin kufitar në Konçul. Përmes një postimi në Facebook, Haradinaj ka thënë se qeveria do t’i qëndrojë pranë familjes së pjesëtarit të FSK-së, Milosh Shoshiç.
“Që nga dita e djeshme, ushtari i FSK-së, Milosh Shoshiq (i përkatësisë serbe), po mbahet i arrestuar nga policia serbe në vendkalimin kufitar në Konçul. Për këtë veprim shpreh shqetësimin tim dhe të Qeverisë së Republikës së Kosovës”, shkruan Haradinaj.
Ai më tej thotë se kjo praktikë është në kundërshtim të plotë me të gjitha angazhimet që qeveria e Kosovës, bashkë me bashkësinë ndërkombëtare, ka pasur në dy dekadat e fundit për integrim të plotë të komunitetit serb në institucionet e Kosovës.
“Do t’i qëndrojmë pranë familjes Shoshiq”, shprehet Haradinaj.
Arrestimi i pjesëtarit të FSK-së, nga xhandarmeria serbe vije pas deklaratave të zyrtarëve të Qeverise serbe vetëm katër ditë më parë.
Drejtori i Zyrës për Kosovën në qeverinë erbe, Marko Gjuriç ditë më parë kërcënoi me burgim serbët që do bëhen pjesëtarë të FSK-së dhe të ushtrisë së Kosovës.
“Me Ligjin tonë Penal hyrja në formacionet e huaja të armatosura e ilegale, është e kundërligjshme dhe kjo dënohet deri më 10 vjet burgim. Ky është aktivitet ilegal në të cilin qytetarë tanë nuk do të duhej të merrnin pjesë”, ka thënë Gjuriç.
Sipas raportimeve të mediave kosovare në FSK janë 103 pjesëtarë të bashkësisë serbe. /tesheshi.com/
