Është arrestuar në Holandë Arben Frroku, i dënuari me burgim të përjetshëm për vrasjen e komisarit Dritan Lamaj dhe vëllai i ish-deputetit Mark Frroku.
Interpol ka dërguar sot në Policinë shqiptare shkresën zyrtare, ku konfirmon se shenjat e gishtërinjve e të arrestuarit përputhen me ata të Arben Frrokut.
Biznesmeni u arrestua dy ditë më parë i akuzuar për falsifikim dokumentesh, pasi u kap me pasaportë greke që mbante emrin Renato Xhepa. Policia dyshoi se dokumenti është i falsifikuar dhe e zbuloi më pas se ishte i tillë.
Në fakt, burime të tesheshi.com në policinë shqiptare, bëjnë të ditur se policia holandeze e ndqiqte prej disa ditësh Frrokun dhe e kishte vënë në përgjim pas disa informacioneve nga policia shqiptare, e cila kishte nën përgjim familjarë dhe të afërm të tij në Shqipëri.
Ka qenë ish-kryeministri Sali Berisha, i cili ka bërë të ditur dy ditë më parë në një postim në Facebook, se është arrestuar Frroku dhe akuzonte policinë shqiptare për heshtje.
Pikërisht kjo deklaratë ka hapur debatet për informacionet që rrjedhin nga organet shtetërore dhe i kalojnë ish-kreut të qeverisë.
Deputeti i PS-së, Arben Çuko akuzoi kreun e SHISH-it që informon Berishën dhe në këtë rast dyshohet se shërbimi secret ka qenë në dijeni të telefonatave ndërmjet krerëve të policisë dhe autoriteteve holandeze mbi arrestimin e Arben Frrokut.
Dy muaj më parë ka qenë ambasadori amerikan që ka përmendur me emra Arben Frrokun dhe Emiljano Shullazin, si njerëz që janë “të paprekshëm”, por realisht të dy që u përmendën me emër nga Donald Lu, tashmë ndodhen prapa hekurave. Të jetë rastësi?!
/tesheshi.com/
