Alexey Ulyukayev, ministri rus i Ekonomisë, është arrestuar për marrjen e një ryshfeti prej dy milionë dollarësh në shkëmbim të mbështetjes së institucionit që ai drejtonte për një marrëveshje të një kompanie të madhe nafte.
Ndërsa ministri është në paraburgim, në pritje të akuzave, nga Komiteti Hetimor i Rusisë mësohet se në lidhje me të po vijojnë veprimet e nevojshme hetuese.
Sipas mediave ruse, Ulyukayev ka qenë që prej një viti nën mbikëqyrje nga Shërbimi i Sigurisë Federale.
Ulyukayev u emërua ministër i Ekonomisë para tre vitesh. Nëse gjendet fajtor, ai rrezikon një dënim me burg nga tetë në pesëmbëdhjetë vite.
BBC-ja thotë se ai është zyrtari më i lartë rus i arrestuar që nga viti 1991. /tesheshi.com/
