Autoritetet turke kanë arrestuar kapitenin e një avioni të Pegasus Airlines, i cili doli jashtë pistës në aeroportin e “Sabiha Gokcen” të Stambollit në fillim të shkurtit ku u vranë tre persona, raportoi Reuters.
Avioni, i cili po fluturonte nga Izmir për në Stamboll, rrëshqiti jashtë pistës së lagësht, goditi një argjinaturë aty pranë, duke u ndarë në tre pjesë.
Për pasojë, tre persona humbën jetën, ndërsa 179 u plagosën.
Në bord kishte 183 pasagjerë dhe ekuipazh.
Pas përplasjes, të dy pilotët u morën në pyetje dhe njëri prej tyre, kapiteni Mahmut Arslan u arrestua.
Pegasus është një transportues ajror loë cost me qendër në Stamboll, kryesisht brenda Turqisë, por edhe për në destinacione në Evropë, Lindjen e Mesme dhe Azinë Qendrore.
Në fillim të janarit të këtij viti, një aeroplan nga e njëjta linjë ajrore që mbante 164 persona, doli nga pista në të njëjtin aeroport të Stambollit. Në atë inciden nuk pati viktima apo të plagosur. /tesheshi.com/
