Sot në pikën kufitare në Vërmicë u arrestua anëtari i Kryesisë së Lëvizjes Vetëvendosje, Artan Abrashi. Këtë e ka bërë të ditur VV me anë të një komunikate për media. Sipas tyre, ky arrestim, u bë me urdhër-arrest të vjetër, me të cilin është arrestuar më parë aktivisti Abrashi.
“Sistemi gjyqësor dhe Policia e Kosovës po vazhdojnë të keqpërdoren nga ky pushtet kriminal, duke përndjekur e arrestuar aktivistë të Lëvizjes për aksione të mëhershme politike. Arrestimet e tilla nga ky pushtet jolegjitim po tentojnë që ta dobësojnë Lëvizjen Vetëvendosje në luftën e saj për një Kosovë sovrane e demokratike, kundër këtij regjimi autoritar”, thuhet në komunikatën e VV-së.
Kjo Lëvizje, bën thirrje që të ndalen përndjekjet dhe arrestimet e tilla, të lirohen aktivistët e arrestuar, dhe të çlirohet një herë e përgjithmonë sistemi i drejtësisë ashtu që të mund të ketë shtet të së drejtës dhe shtet të barabartë për të gjithë.
“Gjykatat dhe Policia do të duhej të angazhoheshin në luftimin e krimit të organizuar dhe korrupsionit, që nyjet i kanë në majat e pushtetit”, përfundon VV. /tesheshi.com/
