Janë arrestuar tre deputetët e Lëvizjes Vetëvendosje, Albin Kurti, Donika Kadaj- Bujupi dhe Albulena Haxhiu derisa po hynin në objektin e Kuvendit të Kosovës për vazhdimin e seancës.
Për disa minuta para ndërtesës së Kuvendit deptutetët e VV-së janë shtyrë me policinë duke dashur që ta pengojnë edhe lëvizjen e furgonit që barte deputetin Kurti pasi ky u arrestua. Në këtë rast u hodh edhe sprej.
Arrestimi i vetëvendosësve është kryer me urdhërarrest që e ka lëshuar Gjykata Themelore në Prishtinë gjatë ditës së djeshme, pasi të njëjtit nuk janë paraqitur në seancë.
Tre deputetët akuzohen, për siç thuhet, përdorim të armës ose mjetit të rrezikshëm, përkatësisht hedhjes së gazit lotësjellës në Kuvendin e Kosovës dhe pengim të personit zyrtar në kryerje të detyrës zyrtare.
Visar Ymeri, kryetar i Vetëvendosje-s, pas arrestimit të kolgëve, ka thënë se kjo është një përndjekje masive që ka filluar ndaj partisë së tij nga pushteti.
Sipas tij, deputetët u ndaluan me brutalitet, për çka pësuan edhe deputetët tjerë.
“Kjo është vazhdimësi e veprave të pushtetit, pas dënimit të aktivistëve tanë padrejtësisht. Është e njëjta klikë e pushtetit, e cila po synon që ta dhunoj votën e lirë të qytetarit, pas vendimit të djeshëm të PZAP-it dhe që po tentojnë të përndjekin secilin aktivistë të Vetëvendosjes”, ka thënë Ymeri. /tesheshi.com/
