Lëvizja Vetëvendosje me anë të një postimi në llogarinë e tij në Facebook, ka njoftuar për arrestimin e aktivistit të kësaj lëvizje që njëherit është edhe shtetas i Shqipërisë Arbër Zaimi.
VV thotë se policia e arrestoi Zaimin vetëm për shkak sa ka shtetësi të Republikës së Shqipërisë.
“Siç po duket, Qeveria e Kosovës është e vendosur që të largojë nga Kosova secilin qytetar të Republikës së Shqipërisë, dhe po aq e vendosur që të lehtësojë intervenimet e ndryshme, legale dhe ilegale të Serbisë. Isa Mustafa në njërën anë e ka hapur Kosovën ekonomikisht dhe politikisht ndaj armikut tonë shekullor, Serbisë, kurse në anën tjetër përherë e më shumë po shfaqë tendenca armiqësore ndaj Republikës së Shqipërisë. Kjo përshtatet plotësisht me politikat e Kryeministrit për të kthyer ndikimin e Serbisë brenda Kosovës”, thuhet në njoftim.
VV më tej thotë se qeveria që arreston opozitën, kërcënon gazetarët, deporton nga Kosova qytetarët e Republikës së Shqipërisë, është e papranueshme për qytetarët e Republikës.
“Ne i bëjmë thirrje shtetit shqiptar që të përfshihet në këto skandale dhe të ndikojë që Qeveria e Kosovës të mos ndërmarrë veprime të tilla jodemokratike dhe absurd”, thekson VV.
Kjo lëvizje më tej thotë se më 26 mars, masivisht do të dëshmohet vullneti për ndërrimin e këtyre politikave që po e shkatërrojnë lirinë dhe demokracinë në Kosovë. /tesheshi.com/
