Mensur Krasniqi
Në mëngjesin e sotëm policia maqedonase ka arrestuar personat e dyshuar që kanë kërcënuar para disa ditësh nënkryetarin e BDI-së dhe kryetar i komunës së Çairit, Izet Mexhitin.
Nga Ministria e Punëve të Brendshme të Maqedonisë tashmë kanë konfirmuar aksionin e sotëm. Sipas tyre policia ka arrestuar vetëm dy të dyshuarit, ndërsa dy të tjerë ndodhen në arrati. Në mesin e të arrestuarve sipas inicialeve që ka publikuar MPB, ndodhet edhe njëri ndër funksionarët e BDI-së, Valon Bela.
“Në mëngjes janë arrestuar dy persona, 38 vjeçari V.B. dhe 27 vjeçari B. R. Arrestimi ka ndodhur për shkak të dyshimeve për kryerje të veprës penale ”cenim sigurie”. Vepra ka ndodhur më 6 qershor 2016. Dy persona të tjerë janë në kërkim, ndërkaq me dy tashmë të arrestuarit po bisedohet”, thonë nga MPB-ja.
Ndryshe e përditshmja maqedonase “Dnevnik” ka zbuluar se Izet Mexhiti i është shmangur takimit me grupë rreth 20 personave të cilët kanë hyrë në zyrën e tij. Nga MPB e kanë konfirmuar ngjarjen, por edhe nga aty nuk kanë dhënë detaje se çka kërkoi grupi prej rreth 20 anëtarësh nga kryetari i Çairit. Flitet edhe për atë se në momentin kur grupi ka kuptuar se Mexhiti nuk gjendej në ndërtesën e komunës, si porosi i kanë lënë një plumb, shkroi Dnevnik, media që njihet si e afërt me pushtetin VMRO – BDI.
Jozyrtarisht, “Dnevnik” i ka përmendur biznis-intereset ose trysnitë për realizimin e interesave të dikujt si arsye e mundshme për këtë uzurpim të përkohshëm të zyrës së kreut të Çairit, Izet Mexhiti. /tesheshi.com/
