Ndërsa kanë kaluar vetëm dy ditë nga tragjedia në Mesdhe, ku u mbyt një anije me mbi 800 persona në bord, prokuroria italiane ka urdhëruar arrestimin e kapitenit dhe zëvendës-kapitenit të anijes.
Ata janë të akuzuarit kryesorë për shkaktimin e kësaj tragjedie si dhe për pjesëmarrje në rrjetin e trafikut të qenieve njerëzore.
Të ndaluarit, bashkë me 26 të mbijetuarit e anijes kanë mbërritur ditën e hënë në portin e Katanias, ndërsa ende nuk dihet i saktë numri i viktimave. Dyshohet që në bordin e anijes të ishin mbi 950 vetë, mes tyre 200 femra dhe 50 fëmijë.
Edhe pse ende e pasigurt, Organizata e Kombeve të Bashkuara bëri me dije se 800 persona mund të kenë humbur jetën.
Ndërkohë skuadrat e shpëtimit nga Italia dhe Malta raportohet që po punojnë për të shpëtuar pasagjerët e dy mjeteve të tjerë lundrues që janë nisur nga Afrika veriore për në brigjet e Italisë./tesheshi.com/
