Nuk ka të ndalur arrestimi i aktivistëve të Lëvizjes Vetëvendosje. Policia e Kosovës sot ka arrestuar edhe katër aktivistë të kësaj lëvizje.
VV përmes një kumtese njofton se aktivistët Zgjim Hyseni, Egzon Azemi, Arbër Morina dhe Lekë Isufi janë arrestuar gjatë periudhës që po merreshin me aktivitetet e planifikuara për datën 8 Mars, Ditën Ndërkombëtare të Gruas.
“Arsyet pse policia i ka arrestuar aktivistët, si zakonisht nuk janë bërë të ditura. Atyre nuk i është treguar asnjë fletarrest, dhe sipas traditës së shtetit policor, thjesht janë kidnapuar në një aksion të papritur ku janë angazhuar policë të uniformuar dhe policë civilë”, thuhet në njoftim.
VV thotë se organizimi i këtij arrestimi në mes të një rruge kryesore të Prishtinës, në një orar tepër të frekuentuar prej këmbësorëve, tregon se sulmet policore të urdhëruara nga pushteti kriminal, kanë si synim edhe terrorizimin e qytetarëve.
Vetëvendosje kërkon lirimin e menjëhershëm të aktivistëve, dhe siç thotë dënimin e urdhërdhënësve e zbatuesve të këtyre veprimeve të përndjekjes politike. /tesheshi.com/
