Dy inspektorë të Agjencisë Kombëtare të Ushqimit u arrestuan nga policia e Tiranës në kuadër të operacionit “Neë Start”. Zyrtarisht policia njoftoi arrestimin e Alfred Mahmuti dhe Erlinda Dervishi, me detyrë inspektorë terreni pranë AKU.
Arrestimi i tyre u bë pasi gjatë kontrolleve të ushtruara ditën e djeshme nga strukturat e Drejtorisë Vendore të Policisë Tiranë dhe Agjencisë Kombëtare të Ushqimit, në 2 subjekte (thertore) është konstatuar liçencimi në kundërshtim me kriteret ligjore.
Policia e Tiranës në bashkëpunim me AKU-në, por edhe agjenci të tjera ligjore po vijojnë kontrollet në mënyrë intesive për evidentimin dhe goditjen e paligjshmërisë, apo rastet e abuzimit dhe shpërdorimit të detyrës nga punonjës të këtyre strukturave.
Policia e Shtetit e konsideron të rëndësishëm dhe efikas bashkëpunimin me qytetarët, shoqërinë civile dhe median, e në këtë kuadër fton ata të denoncojnë çdo rast të paligjshmërisë në numrin falas 112, duke garantuar reagimin në kohë dhe të paanshëm. /tesheshi.com/
