Autoritetet saudite kanë arrestuar 19 persona për sulmet në fillim të kësaj jave në xhaminë e Profetit në Medinë, në Xhedda e në Katif. 12 prej tyre janë pakistanezë, e shtatë janë sauditë, bën me dije Al Jazeera.
Personi që hodhi veten në erë të hënën në sulmin në xhaminë e Profetit mësohet të ketë qenë një 26-vjeçar saudit, i njohur më parë si përdorues droge.
Ndërsa nga tre personat që kryen shpërthime në të njëjtën ditë në Katif, asnjë prej tyre nuk posedonte një kartë identiteti saudite. Mosha e tyre ishte rreth të njëzetave, e njëri prej tyre kishte marrë pjesë më herët në protestat antiqeveritare.
Pranë konsullatës amerikane në Xhedda pati një shpërthim po të hënën, nga i cili mbeti i vrarë vetëm ekzekutuesi i sulmit.
Ministria e Brendshme saudite e identifikoi atë si një qytetar pakistanez në të tridhjetat, që kishte ardhur në Xhedda dymbëdhjetë vite të shkuara, për të jetuar aty me familjen e tij.
Sulmet në tre qytetet pretendohet të kenë qenë të koordinuara, edhe pse për to nuk e ka marrë përgjegjësinë asnjë grup.
Sulmi në Medinë një ditë para mbarimit të Ramazanit u dënua ashpër nga e tërë bota muslimane.
Mbreti saudit ka premtuar grusht të hekurt ndaj atyre që kërkojnë të sjellin pështjellim në vendin e tij. /tesheshi.com/
