Arrestimi, apo dhe vetdorëzimi i Klement Balilit, të shumëkërkuarit prej dy vitesh nga policia, vjen në një kohë të një tensioni të lartë politik, që në sfond, veç të tjerave, ka dhe përplasjen e radhës dhe në një formë të pashembullt, atë mes kryeministrit Rama dhe Presidentit Meta. Me shenja të një komploti anti-Rama, duke nisur që nga studentët, shkrimet në VOA, “kthimin” e Metës në LSI, vjen ku zhvillim i bujshëm që pritet t’u japë tjetër udhë çështjeve të ditës.
E duke qëndruar te Balili, është rasti të theksohet se kapja e tij mundet të mos jetë një koinçidencë kohore me të gjitha këto zhvillime.
Aq më tepër kur është fjala për një eksponent që ka qenë i lidhur me politikën, e për më tepër me LSI-në.
Eshtë në fakt një detaj që është tentuar të mbahet në hije; pra që Klement Balili ishte një nga drejtorët e LSI-së, emëruar në valën e post-zgjedhjeve të vitit 2013, kohë kur po viheshin themelet e pushtetit të ri të majtë.
Po si u gjendën Balilajt në partinë e Ilir Metës dhe pranë njeriut që është sot presiden?
Ç’prej ndërrimit të sistemit, si një familje me njollë politike, Balilajt kanë qenë afër PD-së. Edhe pse jo në vijën e parë me poste a pozita, ata, si çdokush afër partive, kanë patur benefitet e tyre gjatë kohës kur ka qeverisur e djathta. Si një familje me peshë në pellgun mes Sarandës dhe Delvinës, ata kurrë nuk patur damkën e kriminelëve a të frikshmëve, përkundrazi janë shfaqur dhe babaxhanë me popullin rreth tyre, e në këtë terren kanë vepruar me biznese e pozita që u kanë dhënë fuqi financiare. Ndërsa roli i Klemend Balilit me trafikun e drogës, nga pëshpërimat apo perceptimet e zonës, pritet të provohet në gjykatë se deri në ç’masë ka qenë. E vërteta është se, edhe pse afër PD-së, në kohën e qeverisjes së kësaj të fundit, në vitin 2006-të Balili është arrestuar e liruar më pas, me akuzën për trafik droge.
Dhe në vitet e aleancës mes PD-së e LSI-së, ndodhi më pas një kalim pragmatik i Balilajve në kampin e Metës, për të marrë formë të plotë me qeverisjen e re PS-LSI, që patën si epilog inagurimin e Santa Quaranta-s, ku gati gjysma e qeverisës, e patjetër ministrat e LSI-së e vetë Meta ishin aty, si dhe emërimin e Kelit drejtor, për herë të parë në administratë publike, pa asnjë përvojë të mëparshme. Dhe pikërisht te një hambar lekësh siç janë Patentat – Transporti Rrugor. Megjithatë, performanca e Kelit-drejtor ka qenë tejet korrekte, deri kur plasi cështja e tij në maj të 2016-ës, nga shkrimet e mediave greke.
Dhe detaji që ai ishte i LSI-së, u la pothuajse mënjanë. As PS, por dhe as PD, nuk preferuan ta potencojnë këtë të dhënë. Kjo e fundit ia la Ramës në derë, e ky e mbajti, pa e kaluar atje ku në fakt e kish vendin, te aleati. E ky është rasti për të thënë se politikisht, Balili i pati të dy këmbët në tre parti. /tesheshi.com/
