Nga Blendi Gashi
Që nga mbrëmja e ditës së enjte, komandati rajonal i policisë së Kosovës për rajonin e Mitrovicës, Nehat Thaçi është në duart e Serbisë.
Ai është arrestuar në bazë të një fletarresti nga shteti serb për “terrorizëm”, pasi që, mes tjerash, sipas aktakuzës së Gjykatës së Nishit, ka tentuar të dëbojë serbët nga Kosova, konkretisht Lipjani, në vitin 1999.
Ndërsa, Gjykata e Nishit dje i shqiptoi dënimin prej 30 ditësh paraburgim policit Thaçi, institucionet e Kosovës për një ditë të plotë heshtën duke mos thënë asnjë fjalë për arrestimin e policit, pra, për poshtërimin e vazhdueshëm që po i bëhet nga Serbia.
Ndërsa, Serbia fare nuk e çan kokën për marrëveshjet e arritura në Bruksel, siç është ajo për marrëveshjen e lirë, vlen të theksohet se shteti ynë asnjëherë nuk përdorë reciprocitet, pasi nuk arreston kriminelët serb të cilët jo rrallë herë hynë në shtetin tonë edhe pse kryen krime në luftën e fundit.
Se Serbia, jo veç që poshtëron Kosovën, por edhe fare nuk e çan kokën për atë çfarë thotë pala kosovare në Bruksel, është dëshmia më e mirë rasti i policit Thaçi, çështje kjo që u shtrua si temë diskutimi, ku ministrja Edita Tahiri kërkoi lirimin e menjëhershëm të policit, por ashtu siç pritej kërkesa e saj nuk u mor fare parasysh nga pala serbe.
Paralajmërimi i “fortë” i Edita Tahirit
Ministrja për Dialog, Edita Tahiri duke parë se mori një “shuplakë” të fortë nga pala serbe, ajo së fundmi ka dhënë një paralajmërim që vështirë se mund të mbahet nga institucionet kosovare, se nëse kështu vazhdon Serbia me arrestimet, atëherë edhe Kosova do të përgjigjet me reciprocitet.
“U kam thënë se, nëse Serbia do të vazhdojë kështu, edhe autoritetet tona respektive të drejtësisë do të ndërmarrin reciprocitet, për shkak se ne në frymën e dialogut dhe përpjekjeve për të normalizuar marrëdhëniet kemi qenë të kujdesshëm, pra edhe ne duhet të paktën të përgjigjemi me reciprocitet”, ka thënë Tahiri.
“Qeveria ‘Mustafa’ s’ka guxim të përgjigjet me reciprocitet”
Partitë opozitare në Kosovë e shohin të domosdoshme përdorimin e reciprocitetit ndaj Serbisë jo vetëm për arrestimet por edhe për të gjitha fushat tjera, por pak besojnë në fjalët e ministres Tahiri.
Avni Arifi, nga Aleana për Ardhmërinë e Kosovës (AAK), thotë se institucionet e Kosovës në vend që të përdorin reciprocitetin ndaj Serbisë, po bëhen servilë.
“O reciprocitet o servilitet. Këtu mes nuk ka. Fatëkeqsisht tanët nuk po udhëheqin në parimin e reciprocitetit. Njerëzit e shantazhuar për korrupsion as në kafe nuk guxojnë me dal pa leje e lëre më vendos reciprocitet ndaj Serbisë”, thotë Arifi, për tesheshi.com.
Edhe sekretari i partisë NISMA për Kosovën, Bilall Sherifi, thotë se pashmangshëm qeveria aktuale do të duhej të përgjigjej me reciprocitet ndaj Serbisë edhe për arrestimet por sipas tij për të bërë një gjë të tillë duhet pasur guxim.
“Ajo që duhet dhe ajo qfarë kjo qeveri mund dhe ka guxim të bëjë janë dy gjëra të ndryshme. Me Serbinë jo vetëm tash që ndodhi arrestimi i policit, por gjithnjë në të gjitha fushat është dashur të aplikohet reciprociteti. Por megjithatë së paku tani duhet filluar të zbatohet reciprociteti me Serbinë. Koha ka dëshmuar që Serbia nuk ka ndryshuar në përmbajtje por vetëm në formë”, thotë Sherifi, për tesheshi.com.
KMDLNJ: Serbia po e poshtëron Kosovën, të reagohet me reciprocitet
Këshilli për Mbrojtjen e të Drejtave dhe Lirive të Njeriut (KMDLNJ), thotë se arrestimet e qytetarëve të Kosovës nga Serbia, siç është rasti i fundit i arrestimit t ë policit Thaçi është vazhdim i poshtërimit të Serbisë ndaj Kosovës, për çka kërkon nga shteti ynë të reagoj me reciprocitet.
“Çdo shtet normal, në këtë rast do të përgjigjej me reciprocitet dhe kjo është vërejtja për institucionet e Kosovës që po tregohen aq tolerantë ndaj një neoçetniku siç është Marko Gjuriq që është kryeministër i serbëve të Kosovës dhe ministrave shovinistë të qeverisë Mustafa. Arrestimi i Nehat Thaçit nuk do të jetë arrestimi i fundit dhe pyetja është : deri kur do të durojmë poshtërimin shtetëror dhe kombëtar dhe do të lejojmë këtë poshtrim të arrestimeve të zyrtarëve dhe qytetarëve të Kosovës sikur edhe deri kur do t’i durojmë eskursionet çetnike dhe shoviniste të zyrtarëve të Serbisë në Kosovë dhe ministrave të Serbisë , në qeverinë e Kosovës ?!“, thotë KMDLNJ.
Ndryshe, në prill të këtij viti, ish-gjenerali i ushtrisë jugosllave dhe serbe, Milovan Bojovic u ndalua nga policia e Kosovës në pikën kufitare në Merdarë, nën dyshimin se kreu krime lufte në Kosovë, por autoritetet kosovare që e ndaluan atë për kalim të paautorizuar të kufirit, e liruan menjëherë në mungesë të provave.
Vendimi i Gjykatës së Apelit për lirimin e ish-gjeneralit serb nuk u mirëprit nga qytetarët e Kosovës që e njohin si njeriun me përgjegjësi komanduese dhe udhëheqës të forcave ushtarake serbe në zonën e Llapit gjatë viteve 1998-1999. /tesheshi.com/
