SPAK ka dhënë detaje të arsyes së arrestimit të dy zyrtareve të larta në Ministrinë e Shëndetësisë, kryesore Joana Duro, Sekretare e Përgjithshme.
“Prokuroria e Posaçme Kundër Korrupsionit dhe Krimit të Organizuar, mbi bazën e informacioneve të sigurura nga Hetuesit e Byrosë Kombëtare të Hetimit, ka regjistruar procedimin penal 10/1 të vitit 2023, për veprat penale ‘Korrupsioni pasiv i funksionarëve të lartë shtetërorë ose i të zgjedhurve vendor’ dhe ‘Korrupsioni aktiv i funksionarëve të lartë shtetërorë ose të zgjedhurve vendorë’, parashikuar nga nenet 260 dhe 245 të Kodit Penal.
Nga ndjekja me metoda speciale të hetimit janë grumbulluar prova të cilat kanë evidentuar se, një operator ekonomik do të jepte një përfitim të parregullt (në formën e shumave monetare) me qëllim shpalljen fitues në një procedure prokurimi të zhvilluar nga Ministria e Shëndetësisë e Mbrojtjes Sociale (në cilësinë e Autoritetit Kontraktor), Prokurimi në fjalë ishte me objekt “Lot 1 ‘Supervizim për rikonstruksionin e disa Qendrave Shëndetësore në qarqet Tiranë e Durrës’.
Pas kryerjes së disa veprimeve hetimore, u krijuan dyshime se shtetësja J. D., me detyrë Sekretare e Përgjithshme e Ministrisë së Shëndetësisë e Mbrojtjes Sociale ka marrë një përfitim të parregullt në shumën prej 330.000 (treqind e tridhjetë mijë) lekë, për të favorizuar një Operator Ekonomik. Këto vlera monetare u dhanë nga shtetësja L. Sh. (Laura Sheto), me detyrë Specialiste e Nivelit të Lartë në Agjensinë e Ofrimit të Shërbimeve Publike të Integruara”, njofton SPAK. /tesheshi.com/
