Nga Blendi Gashi
Siç u bë me dije një ditë më parë, serbët arrestuan një tjetër shtetas nga Kosova me pretendimin se ka kryer krime gjatë luftës kundër popullatës serbe, njëjtë si me Nehat Thaçin, kryepolicin e Mitrovicës. Hilmi Kelmendi po kthehej me emigracioni pushime në vendlindja teksa është prangosur. Atij i është shqiptuar masa prej 30 ditësh paraburgim nga Gjykata e Beogradit.
Hilmiu, i cili po mbahet në qendrën e paraburgimit në Beograd, është me qëndrim të përhershëm në Gjermani.
Për rastin deri më tani ka reaguar vetëm Ministria e Jashtme e Kosovës e cila u ka bërë thirrje shqiptarëve të Kosovës që të shmangin kalimin nëpër Serbi në këtë kohë, duke lënë të kuptohet se shteti i Kosovës nuk mund të bëj diç nëse arrestohen kosovarët në Serbi, gjë që është dëshmuar edhe me rastin e Nehat Thaçit i cili vazhdon të mbahet në paraburgim.
MPJ duke parë se Serbia nuk ia vë fare veshin reagimeve të Kosovës, ka paralajmëruar se çështjen e arrestimit të shtetasve kosovarë ta ngrejë edhe në nivelet më të larta me miqtë ndërkombëtarë, SHBA-të dhe BE-në, si dhe tek të gjitha shtetet mike.
Portali tesheshi.com ka kontaktuar me Hysni Kelmendin vëllain e Hilmiut për të kuptuar më shumë rreth arrestimit të tij.
Hysniu, në rrëfimin e tij tregon se si është gjendja e vëllait të tij, për bisedën që ka pasur me të pas arrestimit, dhe tregon si po trajtohet ai në burg.
Hysniu, tregon se vëllai i tij u arrestua në kufirin mes Kroacisë dhe Serbisë, mes së premtes dhe të shtunës teksa po vinte në pushime në Kosovë nga Gjermania.
“Ka qenë duke udhëtuar me mik të vetin, pra e ka pas bashkëudhëtarë. Familja jonë lajmin për arrestimin e vëllait e ka kuptuar të shtunën në ora 07:00 të mëngjesit. Mua më ka lajmëruar miku në telefon”, tregon Hysniu, për tesheshi.com.
A, më tej rrëfen se kjo është hera e parë që vëllai i tij ka kaluar nëpër Serbi, ndërsa ka treguar se ka biseduar me vëllan pas arrestimit.
“Po më ka telefonu vëllai pas 48 orëve paraburgim. Po trajtohet mesatarisht mirë”, thotë Hysniu.
Apel edhe Gjermanisë që të mundësojnë lirimin e vëllait
Ai ka një apel për institucionet e vendit, por edhe për ato gjermane, shtet në të cilin jeton vëllai i tij.
“Shpresojmë që shteti jonë të bëj më shumë për qytetarët e vet dhe të lirohet vëllai im sa më shpejtë. U bëj apel edhe institucioneve gjermane të interesohen për rastin e vëllait tim që është në qëndrim të përhershëm në Gjermani dhe gjithë familja e tij janë nënshtetas gjerman”, thotë Hysniu, për tesheshi.com.
Për trajtuar rastin e Hilmi Kelmendit, Ministria e Punëve të Jashtme e Kosovës ka angazhuar dhe një ekip avokatësh.
Zëdhënësi i MPJ-së, Bashmir Xhemaj ka konfirmuar një gjë të tillë për mediat, duke thënë se angazhimi i ekipës së avokatëve bëhet për të ndihmuar jo vetëm Kelmendin por edhe të gjithë kosovarët e tjerë të cilët arrestohen në një mënyrë të tillë. /tesheshi.com/
