Policia e Shtetit arrestoi kryeinspektorin e IMT Vlorë, Kledjon Rama, me akuzën e shpërdorimit të detyrës.
Për zyrtarin e Bashkisë së Vlorës kishte një vendim gjykate me arrest në burg, bazuar në kërkesën e Prokurorisë së Rrethit Gjyqësor.
Pas njoftimit të policisë mbi ekzekutimin e vendimit të gjykatës, Prokuroria ka publikuar edhe dosjen me akuzat e ngritura ndaj kryeinspektorit.
Dosja e Prokurorisë
Me kërkesë të Prokurorisë së Vlorës, gjykata ka caktuar masën e sigurise “arrest me burg” për kryeinspektorin e Mbrojtjes së Territorit, Bashkia Vlorë, Kledjon Rama, i dyshuar për “shpërdorim detyre”. Masa e caktuar nga gjykata është zbatuar nga Policia.
Nga të dhënat hetimore të deritanishme rezulton se: Prokuroria Vlorë, ka rregjistruar kryesisht procedimin penal
Nga hetimet e kryera ka rezultuar se, në Prokurorinë pranë Gjykatës së Shkallës së Parë Vlorë, vetëm për gjashtë muajt e parë të vitit 2017, janë referuar dhe regjistruar në regjistrin e veprave penale 81 (tetëdhjetë e një ) materiale për veprën penale të parashikuar nga neni 199/a i Kodit Penal. Nga administrimi i këtyre materialeve rezulton se në asnjë prej këtyrë rasteve nuk ka paraqitur kallëzim penal IMT pranë Bashkisë Vlorë.
Ndërsa nga administrimi i dokumenteve pranë IMT në Bashkinë Vlorë, rezulton se ky institucion nuk ka mbajtur asnjë procedurë administrative në lidhje me 81 (tetëdhjetë e një rastet), për të cilat shërbimet e policisë gjyqësore kanë referuar materialet hetimore në Prokurorinë pranë Gjykatës së Shkallës së Parë Vlorë, për veprën penale “Ndërtimi i paligjshëm”, parashikuar nga neni 199/a i Kodit Penal.
Nga të dhënat e mësipërme rezulton se nga Kryeinspektori i IMT-së pranë Bashkisë Vlorë, janë kryer veprime/mosveprime që përbëjnë mospërmbushje të rregullt të detyrës, të kryera në kundërshtim me ligjin nr. 9780, datë 16/07/2007 “Për inspektimin e ndërtimit”.
Rezulton se është detyrë funksionale e Kryeinspektorit të IMT-së, që të kontrollojë zbatimin e ligjshmërisë dhe standarteve teknike ne fushën e ndërtimit dhe urbanistikës, si dhe të evidentojë çdo ndërtim pa leje, duke marrë masat përkatëse deri në paraqitjen e kallëzimit penal. Ky detyrim ligjor buron nga nenet 3, 4 dhe 5 të ligjit nr.9780, datë 16/07/2007 “Për inspektimin e ndërtimit”.
Mbi bazën e kërkesës së prokurorit, Gjykata e Rrethit Gjyqësor Vlorë, ka vendosur caktimin e masës së sigurimit “Arrest në burg”, për personin nën hetim Kledjon Ramaj. Rezulton se shërbimet e policisë gjyqësore të Drejtorisë Vendore të Policisë Vlorë kanë bërë të mundur ekzekutimin e këitj vendimi, duke arrestuar më datë 02/08/2017, personin nën hetim Kledjon Ramaj. /tesheshi.com/
